«Эхэ буряад энэ дайда

Элинсэгээм Алтан ургы.

Эгээл юугээрш hэлгэшэгүй-

Эльгэндэмни инаг зулгы!

Түбшэн hайхан тоонто нютаг

Түмэн зонойм түүхэ дугы.

Түби дээрэ марташагүй-

Түрэл дайдам – домог үлгы!»

Д.Ш.Доржогутабай

«Түрэhэн нютагым мэдэхэгүйлтэ, түхэреэн Бургаастайн тэг дунда»

Хүн гээшэ нялха нарайhаа эхилээд, баржагар томо болотороо түрэл нютагаа жэлээ алишье сагта жэгдэ hайханаар hанажа ябадаг. Түрэл нютагайнгаа тала дайдадань, үргэн ехэ ой тайгадань, хада уулануудтань, гол мүрэнүүдтэнь дуратайбди. Түрэhэн нютагhаа хэдышье холо байгаа hаа, тэрэмнай хододоо үнэтэй, ойро дүтэ байдаг лэ.

Хэды сагай үедэ элинсэгүүдээмнай тахижа байhан Баржагар, Бэрхэ уула. Буурагшан, Баян – Сагаан, Гозогор - Сагаан, Айрагта, Царамай обоонуудай хойморто Бургаастайн үргэн тала оршоно.

Урдын сагта Бургаастай нютагта олон булагууд гарадаг, ехэ үдхэн бургааhатай байhан хадаа – Бургаастай гэжэ нэрэтэй дүрбэн гол болоно: Эхин – Бургаастай, Дунда – Бургаастай, Баруун- Бургаастай, Зуун – Бургаастай. Эдэ голнуудта Гутал Буумал угтай зон хони малаа үдхэжэ ажаhуудаг hэн. Эхин – Бургаастай; Дунда – Бургаастайда - Анжалай, Пиртаантан, Ханхайтан ажаhуудаг байгаа. Баруун- Бургаастайда - Согтынар; Зуун – Бургаастайда – Жарбайтан байгаа. Сагаан – Жалга нютагта – Сахьяатан, Батууринтан; Пусааданда- Унагантан. Дабаанай саана, Зүй нютагта – ахинаатан, Хабтуурхатан, Михуулхатан, Ламахайтан байгаа.

Колхозы

Газарынь зургаанай нэгэн хуби

Гансаараа улайгаа эСэСэСэРнэй

Гансахан үеымнай нэгэ нүхэд

Гараараа барисаатай комсомолшууд.

Бүмбэрсэг зургаанай нэгэн хуби,

Бүрхэжэ улайгаа эСэСэСэРнэй.

Бүгэдэ уеымнэй бидэ нухэд,

Бүхэхэн барисаатай комсомолшууд.

Замбуулиин зургаанай нэгэн хуби,

Захадажа улайгаа эСэСэСэРнэй.

Залуушуул үеымнай бидэ нүхэд,

Забhаргүй барисаатай комсомолшууд.

(Арадай дуун Бадужинова Радна – Цыбик Бадмацыреновнаагай үгэhөө)

Сааhаань юунhээ ороо юм

Сагаан далайн мананhаа.

Совет юуhнээ болоо юм,

Cэсэн түрэhэн Ленинhээ.

Бороонь юунhээ ороо юм,

Байгал далайн мананhаа.

Большевик юунhээ болоо юм,

Ворошиловой hургаалhаа.

(Ёохорой дуун)

1928 ондо Бургаастайда«Улаан – Цыцыг»гэжэ артель тогтоогдобо. 1930 онуудаар Загастайн сомондо олон жаахан артельнууд бии болоно: Сагаан – Жалгада артель«Крупскын»нэрэмжэтэ, Зүйдэ артель«Улаан - Ошон»,Буграастайда колхоз им.«Гергесова», хожомынь колхоз им.«Разумова»бии болоно. 1937 ондо хоер артель им.«Крупской»ба им.«Разумова»,тиигээд 1938 ондо артель«Улаан – Ошон»нэгэдэжэ артель«Коминтерн»нэрэтэй болоно. Хожомоо энэ колхоз Новосэлэнгын сомоной зүблэлдэ орожо, Зүйн, Сагаан –Жалгын, Бургаастайн зонууд артелиингаа центрые Бургаастайда болгожо, тиишээ нүүhэн байна.

1950 ондо колхоз им.«Сталинтай»нэгэдэжэ, энэ колхозой отделени болоно. Энэ колхоз хожомынь«Ленинэй»нэрэмжэтэ колхоз болоо hэн.

1966 ондо Бургаастайн отделени совхоз«Темнигтэ»үгтэнэ. Тиигээд совхоз«Бестужевский»гэжэ нэрэтэй болоно.

«Разумов»артелиин түрүүлэгшэ Раднаев Цырен – Доржо,«Коминтерн»артелиин Дабаев Санжа байhан.

Колхоз им.«Сталинай»,«Ленинэй», совхоз«Темнигэй»,«Бестужевский»отделениин ударидагшадаар нютагтаа суута хүнүүд хүдэлhэн байна: Дармаев Тугжи Ринчинович, Сосоров Нима Дашиевич, Цыренжапов Сампил Дамбиевич, Раднажапов Самбу – Доржо Самбуевич, Цыбанов Сергей Добчинович.