Асагадай абьяастай басаган

 Багша шабинараараа омогорходог гэһэн үгэ бии. Ямар багша өөрынгөө һурагшадаараа омогорхожо, баясажа хөөрэхэгүйб даа. Буряад хэлэнэй багша хадаа түрэл хэлэндээ дуратай, амжалтануудые туйлаһан А. Доржиевай нэрэмжэтэ Асагадай юрэнхы һуралсалай дунда һургуулиин һурагша, 12 наһатай Цындыжапова Долгорма тухай хөөрэхэ хүсэлэнтэйб.

 Долгорма хадаа алишье талаараа бэрхэ басаган юм. Эрдэм шудалхадаа абьяастай, эдэбхитэй, уран гартай басаган юм.

 Нэхэхэдээ Долгорма шадамар, бисерээр элдэб гоё бүтээл хэдэг, хэрээһээр шэрэжэ оёһон зүйлнүүдынь һонирхол татадаг, мулине утаһаар элдэб зүүдхэлнүүдые гүрэжэ, хани басагадтаа бэлэглэдэг, бүтээлнүүдынь һургуулингаа, аймагай үзэсхэлэнгүүдтэ нэгэтэ бэшэ табигдаһан, Сагаалганай үедэ үнгэргэгдэдэг гар урлалай мүрысөөнүүдтэ түрүү һууринуудые эзэлдэг.

 Долгорма - шагай наадаар һургуулиингаа чемпион юм, 2010 оной Сагаалганда түрүүлһэндээ тон баярлаа юм, юундэб гэхэдэ энээнһээ урда Чимитов Шойжо-Нима олон жэлэй туршада түрүүлэн ябаа, тэрэ хадаа 1-дэхи республиканска шагай наадаар мүрысөөнэй абсолютна чемпион. Мүнөө Шойжо-Нима - хүдөө ажахын академиин оюутан. 2009 ондо элитэ уран зохёолшо Ц.Г. Шагжинай ойн баяр Хара-Шэбэр тоонтодонь үргэнөөр тэмдэглэгдээ, шагай нааданай мүрысөөндэ Долгорма хабаадажа, ехэшүүлтэй урилдан, хоёрдохи шатын дипломдо хүртөө. Даам наадахадаа баһа шадамар, аймагай мүрысөөндэ хоердохи һуури эзэлээ юм.

 Ћургуулидамнай Шэнэ-Элхиин искусствын һургуулиин филиал гурбадахи жэлээ ажалаа амжалтатай ябуулна. Хоровой студидэ Долгорма ябадаг, ятага дээрэ наадажа һурана.

 Илангаяа буряад хэлэ шудалалгада Долгормаагай амжалтануудые тэмдэглэмээр.

 Загарайнгаа аймагта үнгэргэгдэдэг Буряад хэлэнэй үдэрнүүдтэ Долгорма эдэбхитэй хабаададаг, диктант эрхимээр бэшэдэг. «Чудесный клад Бурятии» гэһэн уран үгын мүрысөөндэ аймагтаа 2-дохи һуури эзэлээ, республиканска конкурсда хабаадаа һэн.

 «Моя родина – Минии нютаг» гэжэ публицист, хизаар ороноо шэнжэлэгшэ, гһрэнэй болон ниитын ажаябуулагша Данзан Дагбаевай республиканска литературна-хизаар ороноо шэнжэлгын конкурсдо хабаадажа, прозоор бэшэһэн зохёолнууд сооһоо нэгэдэхи һуури эзэлээ. Долгорма Түнхэнһөө гарбалтай Молоной Намсарайтан нагасатан тухайгаа бэшэжэ, һайшаалда хүртөө. Уг гарбалаа, түрэл саданараа мэдэжэ ябаха гээшэ тон һайшаалтай хэрэг юм. Агвановска уншалгануудта, «Серебряная альфа» гэӥэн республиканска эрдэмэй-практическа конференциин финалда хабаадаа, Гушад угайнгаа түүхэ домогуудые шэнжэлээ.

 Буряад хэлэн сахим һураха номоор дїрбэдэхиеэ мїрысєєн Буряад хэлэнэй үдэрнүүдтэ үнгэргэгдөө. Эдэ бүхы дүрбэн наадануудта Долгорма эдэбхитэй хабаадаа: 2007 он -1 һуури, Буряад Республикын Президентын болон Правительствын администрациин грамотада хүртөө һэн, 2008 – 2 һуури, 2009 - 4 һуури. 2010 ондо дахин түрүү һуурида гараа. «Амар сайн» гэжэ һалбари соо олон нааданууд бии. Тус нааданууд һурагшадые амитадай, ургамалай аймагтай танилсуулна, тэдэнэр моридой үнгэ зїһэ мэдэхэ болоно, хүнэй бэеын хубинуудтай танилсана. Тиимэһээ эдэ нааданууд үхибүүдэй хүгжэлтэдэ ехэхэн нүлөө үзүүлдэг. Буряад нэрэнүүдые һанажа абахань баһал бэрхэтэй, мүрысөөндэ хабаадаха хадаа Долгорма тон харюусалгатайгаар бэлдэжэ, амжалтануудые туйлаа. Энэ наада эмхидхэһэн, ном зохёогшодто баяр баясхаланаа хүргэнэбди.

 Саашадаа Долгормаада амжалта хүсэжэ, буряад һайхан хэлэн дээрээ харилсажа, хэлэеэ улам хүгжөөжэ, Асагад тоонто нютагайнгаа, һургуулиингаа нэрэ элдэб хэмжээнүүдтэ түлөөлжэ ябахыень хүсэнэб!