1962 ондо Жибзема Дашидондоковна нютагайнгаа дунда һургуули дүургээд, түрэл колхоздоо хүдэлхэ гэһэн үүсхэл гаргагшадай нэгэн мүн. Ж.Д-Д. Базарова 1967 ондо Буряадай багшанарай институдай физико-математическа факультет дүүргээд, Агын, аймагай Һүдэнтын дунда һургуулида физикын багшаар хүдэлжэ эхилһэн юм. Удаань 1971 -1982 онуудта Яруунынгаа Үльдэргын дунда һургуулида багшалһан юм. һургуулиин эхин партийна эмхиие толгойлһон ба классһаа гадуурхи хүдэлмэри эмхидхэгшэ, мүн лектор байгаа. Үльдэргэдэ хүдэлжэ байхадаа, «РСФСР-эй эрдэм һуралсалай отличник» гэһэн үндэр нэрэ зэргэдэ хүртөө.

Түрэл тоонто гээшэ хүн бүхэнэй зүрхэ сэдьхэл татадаг гээшэ. Жибзема Дашидондоковна нютагаа бусажа, Эгэтын Адагайнгаа дунда һургуулида мүнөө болотор хүдэлжэ байһаар. Байн һургуулиин директорэй тушаал эзэлээд, багшанарай коллективые ажалай амжалтын орьёл өөдэ шэглүүлһэн байна.

90-ээд онуудай эхеэр республика дотор һургуулинуудые хүгжөөхэ программанууд абтаһан юм. Манай һургуули энэ хүдэлөөнэй хажуу тээ үлөөгүй һэн бэзэ. Иигэжэ «Социально-педагогическа комплекс» гэһэн хүгжэлтын программа табигдаа һэн. 1993 оной зун республикын Минпросой коллегиин шиидхэбэреэр һургуулимнай туршалгын һургуули болгогдоһон юм. Хүгжэлтын программые бэелүүлхэ гол харюусалга һургуулиин директор Базаровада даалгагдаһан байна. Улаан-Үдын эрдэм һуралсалай управлениин начальник, педагогикын эрдэмэй кандидат Д.Ц.Дугарова научна хүтэлбэрилэгшөөр томилогдоһон байна.

Жибзема Дашидондоковна классһаа гадуурхи хүдэлмэриие эмхидхэгшэ байхаһаа эхилжэ, энэ зорилгые бэелүүлхын тула оролдодог болоһон юм. Жибзема Дашидондоковна классуудые хүтэлбэрилэгшэдтэ бүхы талаһаань, туһалалсадаг болоһон юм. Базарова ахалагша пионервожататай, комсомолой эмхиин секретарьтай нягта холбоотойгоор худэлдэг бэлэй.

1988 оной март һарада манай һургуулида Яруунын, һургуулинуудай хүмүүжүүлэгшэдэй семинар үнгэргэгдөө һэн. Юундэб гэхэдэ, һургуулиин материально-техническэ бааза яһала һайн байшоо бшуу. 1990 оной эхин һарада аймагай баруун захын һургуулинуудай багшанарай январиин конференци үнгэргэһэн юм.

Жибзема Дашидондоковна аймагай һургуулинуудые хүтэлбэрилэгшэдэй эгээл бэрхэ үүсхэл гаргагшадай нэгэн гэжэ тоологдодог. Тиин 1993-1994 онуудай һуралсалай жэлдэ Буряадай колледжтой хамта манай һургуулиин бааза дээрэ педагогическа класс-лицей нээгдэһэн юм.

Педклассые гурбан бүлэг залуушуул дүүргэжэ, шалгалтануудаа амжалтатайгаар баряад, Буряадай педколледждо һуралсалаа үргэлжэлүүлжэ байна.

1997 оной март һарада республикын Эрдэм һуралсалай министерствын коллеги Эгэтын-Адагай социально-педагогическа комплексые мүнөө сагай эрхэ байдалда һайнаар хүдэлнэ гэжэ тэмдэглээ һэн.

Тиигэжэ 1998 оно намар манай Эгэтын-Адагай һургуулида проект бэелүүлхэ федеральна туршалгын талмайн статус олгогдоһон юм. Иигэжэ «Агробизнесэй һургуули» гэһэн национальна социально-педагогическа комплекс байгуулха арга боломжо олгдоһон байна. Иимэ статус олгогдоһон аад, гансал Эгэтын-Адагай һургуули ниитэ һуралсалай һургуули зандаа үлэһэн гэжэ хэлэхэдэ, тон зохид байна. һургуулиин директор Ж.Д.Базарова энэ проект хамгаалхын тула Москва ошоһон байна.

Манай Эгэтын-Адагай һургуули 1992 онһоо эхилжэ, США-гай ба Буряад ороной хүдөөгэй һургуулинуудай хоорондо байгуулагдаһан холбоондо 1997-1998 онуудай һуралсалай жэлһээ хабаадалсана. Хойто Дакота штадай Мотт городой уряалаар Ж.Д.Базарова 11-дэхи классай. хоёр шабинартаяа Америкэ ошожо, тэндэхи хүдөөгэй байдалтай ба фермернүүдэй ажахынуудтай танилсаһан байна.

Энэ оной һуралсалай жэлдэ БГСХА-тай һургуули дүүргэгшэдые тус академидэ оруулха зорилгоор һуралсалай пункт нээлгэндэ бэлдэхэ хэлсээн баталагдаа. Саашадаа һургуулиин багшанар тэндэ стажировко гарадаг болохо.

Манай һургуули республиканска нэгэдэхи выставкэ- конференциин дипломант болоо. Тиигэжэ нэгэдэхи шатын дипломдо хүртөө юм.

Ажабайдал гээшэ байра дээрээ тогтодоггүй тула улам орёо боложо байдаг. СССР-эй, РСФСР-эй эрдэм һуралсалай отличник, Буряад Республикын һургуулиин габьяата багша Жибзема Дашидондоковна Базаровагай габьяата ажал ямараар хүдэлхэ ёһотойб гэһэн жэшээ боложо эндэ үгэнэ. Мүнөө үеын манай Эгэтын-Адагай һургуулиин багшанарай ба һурагшадай коллектив һургуулиингаа ерэхэ жэлдэ 70 жэлэй ойдонь хүтэлбэрилэгшз Жибзема Дашидондоковна Базаровагай хүтэлбэри доро хамсыгаа шаман бэлдэжэ эхилһээр үнинэй даа.

("Буряадай түрүү хүнүүд - 1999" гэhэн республиканска конкурсдо зорюулагдаhан очерк).