Эсэгэ оронойнгоо түлөөбэеэ үгэхөөр бэлэн ябагша.

 Эхи захагай замбуулинай али буландань манай галактика, манай нарата туби эрьелдэнэб – бидэ мэдэнэ бэшэбди. Зүгөө энэ замби түбидэ тоо томшогой мүшэдэй дунда хүн бүхэнэй одон яларжа байдаг гэжэ hанахада, угаа hонин.

 Аяар 91 жэлэй сана энэ дэлхэйдэ, ехэ багашье, холо ойрошье тосхон hууринуудтай, шэдитэ буряадай гуламта болохо Бураяд орон нютагай, жэлэй дүрбэн сагта табир тарган түмэн hүрэг адуу малаараа суутай, хүндэмүүшэ абари зантай Түгын арад зоной дунда хүбүүн түрэжэ, үй түмэн мүшэдэй дунда тереней одон «носоогдоhон» байна бшуу. Энэ хадаа минии элинсэг нагаса Эрдынеев Гарма болоно.

 Хубисхалай hэбшээн үзэгдэжэ, шэнэ байдалай тогтожо байха үедэ, эхэ нютагайнгаа газараар хүлөө шоройтуулhаар мини элинсэг нагаса үхибүүн наhаяа үнгэргөө бэлэй.

Нэмжээ сэлюун дайдынгаа аршаан булагhаа амсажа хүдэржэн, ая гангынгаа хангалаар амилан дали жэгүүрээ дэлин, хаба шадалаа харуулжа, түрэл колхооздоо хүдэлөө.

 Алишье үе сагта алибаа байдал нэгэл жэгдэ байдаггүй. 1941 оной зун фашис Германии манай орондо дайгаар добтолон оробо. Дайн эхилбэ! –гэhэнаюулта мэдээсэл, аадарлан ороhон бороогой буудалта аянгын hомондол дуулдажа, зонойшье досоо заригад гэбэ ха юм. Улан мяхаараа, улан шуhаараа Эхэ ороноо хамгаалхаhаа нангин юумэн энэ түбидэ байхагүй бэлэй. Энэ дайнда наhаа хүсэhэн эрэшүүл даажа,эрхилжэ ябаhан ажалаа эжынэрэйнгээ, эхэнэрнүүдэйнгээ болон үхибүүдэйнгээ «мүр дээрэ» үлээжэ, холын фронт мордохо болоол.

«Байгал далайнгпп баруугаар,

Бархируулаа вагоноор.

Баабай хаанай сэрэгтэ

Байдалаа орхижо мордообди.» - гэжэ сэрэгшэ хүбүүд дуулдаhан гэдэг.

Тэдэнэй дунда мини элинсэг нагаса ябалсаhан байна.

Манай Гарма элинсэг нагасамнай 1941 ондо мордоо hэн. Эрхүү хотодо жэл тухай кавалерийскэ полкдо алба хээ. Ттэндэhээ Баруун фронт эльгээгдэжэ, 67 стрелково полкдо коиандир сасчёта ПТР ябаhан. hүүлэрнь 1942 ондо Воронежско фронтодо дайлалдаhан юм. Воронеж хотые сүлөөлгын тулалдаанда сээжэ руугаа буудуулжа, хүндөөр шархатаhан байна. 1943 ондо тэрэнэйнгээ түлөө гэртээ бусажа ерэhэн юм.

Дайнhаа бусаhаар түрэл колхооздо элдэб янзын ажалда хүдэлжэ, фронтодо туhалсаха гэжэ бүхы шадалаараа оролдосоhон байна. hүүлээ жэлнүүдтэ колхозойнгоо хонин hүрэгые олошоруулан, олон жэлдэ хүдэлөө hэн.

Наhанайнгаа нүхэртэй, мини элинсэг эжытэй, арбан үхибүүдые хүмүүжүүлжэ, наhанайнь замда гаргаа.

Манай элинсэг нагаса Эрдынеев Гарма Эдынеевич арбан үхибүүдэйнгээ, ашанар ба зээнэрэйнгээ, гушанарайнгаа энэ дэлхэй дээрэ, эхэ нютагтаа зол жаргалтай hуухан түлөө Агууехэ дайнда бэеэ үгэхөөр хододоо бэлэн ябаа бшуу. Тиимэhээ бидэ, үри hадаhадынь, энэ эрэлхэг габьяаень, хэhэн хэрэгынь сэдьхэлдээ хадагалжа ябаха нангиин уялгатайбди. Элинсэг нагасымнай дурасхаал сэдьхэлдэмнай хэзээдээшье мүнхэ юм.

Мүнөө морилжо ерэhэн, Агууехэ Илалтын 65 жэлэй ойн баяраар арад түмэнөө амаршалнаб. Түхэреэн энэ дэлхэйдэмнай хүн зон эбтэй эетэй, гүрэн түрэмнай бүхэжэжэ, байhан hууhан нютагууднай сэсэг набшаhаар hалбаржа, ажал хүдэлмэри бурьялжа, наадан зугаа дэлгэржэ үеын үедэ байhан даа.