Эдэ үдэрнүүдтэ Буряад Республикын бүхы аймагуудһаа буряад хэлэ заадаг багшанар мэргэжэлээ дээшэлүүлхэ курсэдэ ерэжэ, долоон хоногой туршада буряад бэшэ яһанай үхибүүдтэ ямар онол аргаар буряад хэлэ заахаб, ажалдаа ямар дүй дүршэл хэрэглэхэб гэһэн асуудалаар хөөрэлдөөн болобо. Һуралсалай хүтэлбэрилэгшэ Эржэн Патанхановна Нанзатова мүн.

Буряад хэлэнэй багшанартай декабриин 15-да уулзабаб, хэн-хэндэмнайшье аша туһатай һонин  хөөрэлдөөн болобо. Интернет гээшые шудалжа, ойлгодог болоод, хэрэглэжэ эхилһээрни жэл болобо, хаанашье хүрэтэр, хэнтэйшье танил нүхэд болоод, скайп гэдэг хии юумээр бэе бэеэ хараад хөөрэлдэхэ, һонирхоһон мэдээсэлээ агшан зуура соо абаад уншаха аргатай, ямаршье жэгтэй һонин сагта ажаһууна гээшэбибди гэжэ би гайхалаа баранагүйб гээд би өөр тухайгаа хөөрэбэб. Фейсбук соо  ямар ехэ мэдээсэл байдаг гээшэб: дуунууд, шүлэгүүд, видеодамжуулганууд, түүхэ, домогууд, суута хүнүүдэй намтар,  үхибүүдтэ зорюулһан толилолгонууд, хоморой шухаг номууд, угай бэшэгүүд, юушье олоод һонирхохо арга боломжотойбди.

Саг сахилгаан түргөөр урагшаа дабхина, энэ сагай эрилтэһээ нэгэшье хожомдонгүй, үрьдилдэн, һонирхолоо алдангүй ябаха ёһотойбди  гэжэ хэлэхэдэмни буряад хэлэнэй багшанар намайе дэмжэбэ. Минии хүтэлдэг “Мүнгэн  тобшо”,  һttp://www.facebook.com/groups/mungentobsһo/, “Будамшуу” һttp://www.facebook.com/BUDAMSҺUU гэдэг блогуудай  хуудаһануудые нээгээд, һонин-һонин мэдээсэл абажа, үхибүүдые  буряад хэлэндэ һургаха ажалдаа хэрэглэхэ аргатайт гэжэ хөөрэбэб. Багшанар һанамжаяа хэлэхэдээ, “Будамшууда” буряад арадай  нааданууд, ёһо заншалнууд, түүхэ домогууд тухай, ёохор хатарай заабаринуудые, ёохорой дуунуудые, жороо үгэнүүдые, оньһон үгэнүүдые, таабаринуудые толиложо байгыт гэжэ дурадхал  оруулба. Энэ уулзалга дээрэ хэн хэндэмнэйшье ашаг үрэтэй, ашаг туһатай хөөрэлдөөн болобо. 

Источник: http://www.minkultrb.ru