Буряад Уласай түлөөлэгшэд Хитадай Харбин хотодо Хэйлунцзян провинциин аяншалгын талаар захиргаантай болон хитадай аяншалгын эмхинүүдтэй уулзалга үнгэргэбэ.

Манай аяншалгын эмхинүүд өөһэдынгөө аяншалгын хэрэгсэлнүүдэй зүйлнүүдтэй танилсуулжа, хитадай  мэргэжэлтэдэй бодото анхарал татуулба. Энэ уулзалга хоёр гүрэнэй аяншалгын хани харилсаанай эхин  табсан боложо үгэхэл ёһотой.

Харбин – Хитадта үбэлэй аяншалгын мэдээжэ болоһон түб гээшэ. Үбэлдөө энээ руу Хитадай дулаан урда зүгэй провинцинуудһаа аяншалагшад ерэжэ, сууда ороһон мүльһэн фестивальда хабаададаг юм. Хитадай аяншалгын эмхинүүд аяншалагшадые угаа һонирхуулхаар элдэб зүйлнүүдые харуулдаг. Тэндэһээ манай үмсын хэрэг эрхилэгшэд дүршэлтэйнь хубаалдажа, Буряадтаа заатагүй үшөө һонин юумэнүүдые дурадхахал байха.

- Аэропорт дээрэ хүн зоной ябаха замай зурагууд ород хэлэн дээрэ дабтаатай байна. Мүн лэ Харбинай аяншалгын газараар гаршагууд, соносхолнууд ород хэлэн дээрэ бэшээтэй байна. Энэнь хадаа Ород гүрэнһөө ерэһэн айлшадай сэдьхэлдэ дулаахан дурсалгануудые үлөөжэ, заатагүй энэ аятайхан абаритай хото руу дахин айлшалан ерэхэеэ хүсэлхөөр лэ ёһотой, - гэжэ Буряад Уласай  аяншалгын сайд Алдар Доржиев тэмдэглээ.