Улас түрын "Бэлиг" түбэй захирал Баир Балданов  Улаан-Үдэ хотын Захиргаанай  дэргэдэхи Буряад хэлэнэй талаар комиссиин зүблөөндэ үсэгэлдэр хабаадаба. Баир Дашеевич энэ комиссиин гэшүүн юм.

Тус зүблөө Буряадай ниислэл хотын мэр Игорь Шутенков үнгэргөө.

Бүгэдэ Буряадай үндэһэн соёлой эблэлэй юрэнхылэгшэ, Улаан-Үдэ хотын һунгамалнуудай зүблэлэй түрүүлэгшэ Чимит Бальжинимаев комиссиин зүблөөн дээрэ  уласай гүрэнэй хэлэн болохо буряад хэлэ сахин хүгжөөлгын шиидхэгдээгүй асуудалнууд тухай элидхэл хээ.  Тэрэ  Буряадай ниислэлдэ хэлэнэй байдалда горитойгоор нүлөөлхэ аргатай тодорхой дурадхалнуудые оруулаа.

Тиихэдэ зүблөөн дээрэ 2024 ондо "Буряад хэлэ сахин хүгжөөлгэ" гэһэн нютагай засагай программа бэелүүлгын дүнгүүд болон хотын тамирай һургуулинуудта буряад хэлэ хэрэглэлгэ тухай элидхэлнүүд шагнагдаа.  Һайшаалтай юумэн гэхэдэ, элидхэлнүүд хоюулаа буряад хэлэн дээрэ зэдэлээ.

Мэриин Ниигэмэй болон залуушуулай бодолгын талаар  хорооной зүбшэлэгшэ Эльвира Дашиева "Буряад хэлэ сахин хүгжөөлгэ" гэһэн хотын программа бэелүүлхэ талаар ажаябуулгын дүнгүүд тухай хөөрэжэ үгөө.

Улаан-Үдэ хотын 12-дохи тамирай һургуулиин захирал Даши-Доржо Биликтуев тамирай һургуулинуудта, һорилгонуудай болон мүрысөөнүүдэй үедэ буряад хэлэ хэрэглэһэн бодото  жэшээнүүдтэй танилсуулаа.

- Ниислэл хотын Захиргаанай зүблөөн дээрэ буряад хэлэн дээрэ элидхэлнүүдэй шагнагдажа байһаниинь туйлалта гээшэ, - гэжэ Баир Балданов тэмдэглээ.

"Бэлиг" түбэй захиралай һанамжаар, һүүлэй хэдэн жэлнүүдэй туршада ниислэл хотын засаг зургаан буряад хэлэ сахин хүгжөөхэ, тэрэниие хэрэглэлгын оршон үргэдхэхэ талаар горитойхон ажал ябуулаа.

- Ганса бидэ бэшэ, харин хотын бүхы ажаһуугшад ниитэ газарнуудта буряад хэлэ ехээр, үргэнөөр хэрэглэдэг боложо байһан хубилалтануудые харана ёһотой гэжэ һананаб. Манай ниислэлдэ бэелүүлэгдэһэн эдэ болон бусадшье удха шанартай түсэлнүүд хадаа  мэриин зорилгото, олон талата ехэ ажалай дүн болоно, - гэжэ Баир Балданов тэмдэглээ.

Зүблөөнэй дүн согсолходоо, Улаан-Үдэ хотын мэр Игорь Шутенков захиргаанай дэргэдэ буряад хэлэнэй мэргэжэлтэнэй тусгаар тушаал байгуулха тухай шиидхэбэри абаһанаа мэдүүлээ. Иимэ дурадхал ВАРК-ын юрэнхылэгшэ, Улаан-Үдын хотын Һунгамалнуудай зүблэлэй түрүүлэгшэ Чимит Бальжинимаевай оруулһан байна.

Зүблөөнэй түгэсхэлдэ "Түрэл хэлэнэй түшэг" гэһэн нютагай засагай шагналда хүртэгшэдые болон хотын түсэлнүүдые бэелүүлгэдэ хабаададаг эдэбхитэдые шагналгын баяр ёһолол үнгэрөө.