Улас түрын «Бэлиг» түбэй Гүрэнэй оршуулгын албанай мэргэжэлтэн, «Байгал» сэдхүүлэй уран һайханай эрхилэгшэ Надежда Гармаева шүлэглэмэл зохёол оршуулагшадай дунда хоёрдохиёо үнгэргэгдэһэн «Буряад уянга - ородоор» гэһэн мүрысөөнэй жюриин бүридэлдэ ажаллаа юм. Энэ жэл «Бэлиг» түб тус хэмжээ ябуулгын эмхидхэгшэдэй нэгэн байгаа гэжэ һануулая.

Мүрысөөн нёдондо түрүүшынхиеэ үнгэргэгдэхэдөө, Буряад Уласай 100 жэлэй ойдо зорюулагдаһан һаа, энэ удаа суута буряад уран шүлэгшэ, мэдээжэ басни зохёогшо, бэлигтэй оршуулагша Гунга Гомбоевич Чимитовэй 100 жэлэй ойн баярта дашарамдуулагдаа. Хэмжээ ябуулгада 32 хүн хабаадажа, мэдээжэ сэдхүүлшэн, уран зохёолшо, уран шүлэгшэ, Оросой Холбоото Уласай соёлой габьяата хүдэлмэрилэгшэ Николай Чимитович Шабаев түрүүтэй жюриин гэшүүдэй сэгнэлтэдэ 84 оршуулга дурадхаһан байна. Хүүгэдэй болон томошуулай шүлэглэмэл зохёолнуудай оршуулга гэһэн хоёр шэглэлээр дүнгүүд гаргагдажа, эрхим оршуулагшадые шагналгын баяр ёһолол Буряад Уласай Үндэһэтэнэй номой санда дулаахан оршон байдалда үнгэрөө.

Томошуулай шүлэглэмэл зохёолнуудай оршуулгын шэглэлээр Нина Тожиловна Дашиева илалта туйлажа, Соёлой яаманһаа 15 мянган түхэригэй шан абаа. 2-дохи һууриие 2 хүн - Долгор Владимировна Цыренова болон Евгения Витальевна Зимина гэгшэд хубаажа, тус тустаа Болбосоролой яаманһаа 10-10 мянган түхэригэй шанда хүртөө. 3-дахи һууриие 3 хүн - Сергей Александрович Санхядов, Ольга Константиновна Царева болон холые холо гэнгүй, аяар Агаһаа зорижо ерээд, шагналгын баяр ёһололдо буряад дэгэлээрээ байһан Оюна Баировна Базарова гэгшэд баһал хубаажа, хүн бүхэндэнь Соёлой яаманһаа 5-5 мянган түхэриг барюулагдаа.

Хүүгэдэй шүлэглэмэл зохёолнуудай оршуулгын шэглэлээр шалгарагшадай мүнгэн шангуудые Буряад Уласай Болбосоролой болон эрдэм ухаанай яаман бүхыдэнь даажа абаһан байна. Тиин тус яаманай Һургуулиин урдахи болон юрэнхы болбосоролой таһагай ахалагша шэнжэлэгшэ Гэрэлма Геннадьевна Дымчикова энэ шэглэлээр амжалта туйлаһан оршуулагшадые амаршалаад, шангуудыень гардуулаа.

Александр Аркадьевич Перенов бултанһаа эрхимээр оршуулаа гэжэ тодоруулагдажа, 15 мянган түхэригэй шанда хүртөө. Татьяна Петровна Григорьева 2-дохи һуури эзэлжэ, 10 мянган түхэриг абаа. Анна Александровна Банаева 3-дахи һуурида гаража, 5 мянган түхэригтэ хүртөө юм.

Уласай хэмжээнэйшье һаа, дэлхэйн ямаршье буланһаа хүн бүхэнэй хабаадаха аргатай «Буряад уянга — ородоор» гэһэн мүрысөөн Орос гүрэнэй оршуулагшадай холбооной Буряадай нютаг можын таһагай хүтэлбэрилэгшэ, Доржо Банзаровай нэрэмжэтэ Буряадай гүрэнэй ехэ һургуулиин профессор, хэлэ бэшэгэй эрдэмэй доктор Полина Пурбуевна Дашинимаевагай үүсхэлээр, жүдхэмжөөр мүндэлөө гэхэдэ, алдуу болохогүй. Юуб гэхэдэ, оршуулагшадые дэмжэхын, нэгэдүүлхын тула мүрысөө үнгэргэдэг болоё гэһэн уряатайгаар Полина Пурбуевна нилээд ябуулга хэһэн байна. Тиигэжэ хүсэлынь Улас түрын «Бэлиг» түбэй дурадхалаар Буряадай Соёлой, Болбосоролой болон эрдэм ухаанай яамануудай дэмжэлгэдэ хүртөөд, жэл бүхэндэ үнгэргэгдэдэг мүрысөөн боложо бэелүүлэгдээ.

Олон тоото үндэһэ яһатаниие багтааһан хизааргүй ехэ Орос гүрэн дотороо, мүн бүхы дэлхэйгээршье буряад һайхан уянгые ородоор зэдэлүүлхэ гэһэн шухала үүргэтэй мүрысөөндэ ямаршье яһанай хүн оролсожо шадаха гэжэ тэмдэглэхэ шухала. Ушарынь гэхэдэ, Доржо Банзаровай нэрэмжэтэ Буряадай гүрэнэй ехэ һургуули зохёолнуудай үгэ, мүр бүхэнэй сэхэ оршуулгануудыень ород хэлэн дээрэ бэлдэжэ үгэдэг юм. Тиимэһээ жэлһээ жэлдэ хабаадагшадай олошоржол байхань дамжаггүй.

Гэрэл зурагууд Буряад Уласай Үндэһэтэнэй номой сангай сайтһаа абтаа