Зэдын аймагай Н.С Сосоровай нэрэмжэтэ Сагаатын юрэнхы болбосоролой дунда һургуулида «Абын табан эрдэм – 2024» гэһэн мүрысөөн Уласай хэмжээндэ үнгэрөө.
Тус харалган түрүүшынхиеэ 2020 ондо Сагаатын һургуулиин буряад хэлэнэй багша Баярма Балданова болон хамта олоной үүсхэлөөр эмхидхэгдэһэн юм. Энэ һанамжань Буряадай болбосоролой болон эрдэм ухаанай яаманда, ГБУ «РЦ «Бэлиг» гэһэн буряад хэлэ хүгжөөлгын улас түрын түбтэ, Сагаатын һургуулиин хабаададаг заншалта соёлой болбосоролой эмхинүүдэй Бүлгэмдэ дэмжэгдэһэн байгаа.
Эмхидхэгшэдэй һанамжаар, энэ хэмжээн ниигэмдэ эсэгэ болон эрэ хүнэй үүргэ дээшэлүүлгэдэ зорюулагдажа, хүбүүдые эсэгын заншалта һургаалаар хүмүүжэлгэдэ нүлөөлхэ зэргэтэй. Гэр бүлэеэ, Эхэ ороноо хамгаалжа шадаха, дүтынхидтөө тулга болохо болон буряад арадай бүһэтэй хүнэй заншалта дүй дүршэл мэдэхэ болон ажаһуудалдаа хэрэглэжэ шадаха – эдэ бүгэдэндэ хара багаһаа хүбүүд һураха ёһотой бшуу.
Энэ харалган табадахияа эмхидхэгдэбэ. Заншалта ёһоороо Орос гүрэн доторой эсэгын Үдэртэ зорюулагдажа, Буряад хэлэнэй габшагай һарын шугамаар үнгэргэгдэдэг. Түсэблэгдэһэн хэмжээн хадаа «Буряад Уласта буряад хэлэ сахин хүгжөөлгэ» гэһэн Гүрэнэй программын мүнгэн зөөреэр болбосоролой болон эрдэм ухаанай яаманаар һомологдодог.
Комментарии