Бүгэдэ Оросой «Түрэл хэлэн болон түрэл уран зохёолой эрхим багша» гэhэн мүрысөөндэ Буряад Уласай Үндэһэтэнэй 1-дэхи лицей-интернадай эхин ангинуудай ба буряад хэлэнэй багша Светлана Раданжапова эрхимлэжэ, нэгэдэхи һуури эзэлбэ. 

Намарай түрүүшын hарада заншалта ёhоороо үнгэргэгдэдэг мэргэжэлтэ энэ мүрысөөн мүнөө жэл Татаар Уласай ниислэл Казань хотодо эмхидхэгдээ. Гүрэнэй 79 нютаг можоһоо 112 багша сугларжа, эрдэм мэдэсэ, бэлиг шадабарияа харуулба. Буряад Уласаа түлөөлжэ ошоhон багшанар Светлана Раданжапова ба Людмила Бальжурова амжалта ехэтэйгээр хабаадаһан байна. 

Буряад Уласай Үндэhэтэнэй 1-дэхи лицей-интернадай эхин ангинуудай ба буряад хэлэнэй багша Светлана Раданжапова түрүү hуури эзэлжэ, буряад нютагаа, үндэһэн хэлэеэ дэлхэй дүүрэн суурхуулба. Хоёрдохи ба гурбадахи hуури удаа дараалан Лейля Гарифзянова (Татаар Улас) ба Ольга Мазурова (Липецкын можо) эзэлбэд. 

Тус мүрысөөнэй заочно шатада багшанар нэн түрүүн ажал тухайгаа тусхай видео буулгажа эльгээhэн байна. Хоёрдохи шатада ажалдаа хэрэглэхэ методическа арганууд тухайгаа элидхэлээ жюриин урда хамгаалаа. Удаань хэлэ мэдэдэггүй хүүгэдтэ түрэл хэлэнэй хэшээл үгэхэ шата байгаа. Светлана Владимировна эдэ шатануудые эрхимээр дабажа, эгээл бэрхэ 15 багшанарай тоодо ороо. Удаадахи шатын шалгалта – ангиин саг үнгэргэхэдөө, түрэл хэлэнэй, түрэл соёлой аргануудаар үхибүүдые мүнөө сагта яажа хүмүүжүүлхэ гээшэб гэжэ багшанар харуулба. Энэ шатада манай багша мүн лэ эрхим байжа, түрүү 5 багшанарай тоодо оробо. Һүүлшын шата – мастер-класс байгаа. 

Тус мүрысөөнэй гол шухала шан Светлана Раданжаповада Оросой Холбоото Уласай гэгээрэлэй яаманай сайд Сергей Кравцов барюулхадаа, түрэл хэлэн болон түрэл уран зохёолой багшанарай удаадахи мүрысөөн Буряад Уласай Улаан-Үдэ хотодо үнгэрхэ гэжэ тэмдэглэбэ.

Хүмүүжүүлэгшэдэй шатада Буряад Уласаа түлөөлhэн Улаан-Үдэ хотын  Людмила Бальжурова амжалтайтайгаар хоёр шата гаража, Росси гүрэнэймнай хүүгэдэй сэсэрлигүүдтэ ажалладаг эгээл эрхим 15 багшанарай тоодо орожо, лауреадай нэрэ зэргэдэ хүртөө.  Энэ хадаа баhа ехэ амжалта гэжэ тэмдэглэмээр. 

Эрхим бэрхэ багшанарай хүтэлбэрилэгшэд Ринчин Дылыковада, Гэрэлма Дымчиковада, мүн хабаадагшадтай хамта энэ үдэрнүүүдтэ ээмээ түшэлсэн ябаhан багшанарай бүлгэмүүдтэ Буряад Уласай болбосоролой болон эрдэм ухаанай яаманай зүгhөө баяр баясхаланаа мэдүүлнэбди. Түрэл хэлэнүүдэй багшанарай мүрысөөндэ хабаадаха арга «Буряад Уласта буряад хэлэ сахин хүгжөөлгэ» гэhэн гүрэнэй программын мүнгэн туhаламжаар бэелүүлэгдэбэ гэжэ хэлэлтэй.