Хархис дай үүсхэгшэ Япон гүрэниие диилэһээр Агуу Илалтын болон Дэлхэйн Хоёрдохи дайнай түгэсхэлэй Үдэртэ дашарамдуулан, Железнодорожно аймагай Шишковка гэһэн бага хороондо оршодог хада дээрэ үдын буудалгын  ёһолол үнгэрбэ. Баяр ёһололой хэмжээндэ Буряадай Уласай Засагай Газарай Захиргаанай түрүүлэгшын орлогшо Евгения Лудупова, Арадай Хуралай, Улаан-Үдэ хотын захиргаанай, ниитэ эмхинүүдэй түлөөлэгшэд болон эдир сэрэгшэд хабаадаа.

Уласай парламентын зүгһөө Арадай Хуралай хүтэлбэрилэгшын уялга саг зуура бэелүүлэгшэ Баир Гармаев удха түгэлдэр түүхэтэ үдэрөөр бүгэдэниие амаршалба.

- Бидэ арадайнгаа баатарлиг түүхэ гамнан сахижа, дайшалхы баатарнуудайнгаа нэрэ нангин хадагалжа байдагбди. Манай үбгэ эсэгэнэр асари томо Квантунска сэрэгые бута сохилсоо бэлэй. Тэдэнэй, илалта шэрэгшэдэй аша гушанар мүнөөдэр тусгаар сэрэгэй үйлэнүүдтэ хабаадажа, Эсэгэ ороноо  эрэлхэг зоригтойгоор   хамгаалжа байна. Сэрэгшэ бүхэнөөр бидэ омогорхонобди! - гэжэ Баир Гармаев мэдээсээ.

Уласай парламентын мэдээсэлэй албан урда тээнь Буряад Уласай Арадай Хуралай түрүүлэгшэ Владимир Павловай амаршалгын үгэнүүдые хэблэһэн байгаа:

- 79 жэлэй саана Дэлхэйн хоёрдохи дайн дүүрэһэн юм. Улаан Армиин сэрэгшэд Квантун армиин сэрэгшэдые бута сохижо,  Манжуурай хараа түсэбтэй, Урда Сахалинай добтолгын болон Куриллын десантна үйлэнүүдые Алас Дурнада ялас гэмэ габьяагаар дүүргээ бэлэй. Энэ үйлэ ябадал хадаа хүн түрэлтэнэй  түүхэдэ эгээл шуһата эсэргүү дайнда Совет арадай бүрин Илалта гэршэлээ ха юм, - гэжэ Владимир Павлов тэмдэглээ.

 Мүн тиихэдэ, Монголой газар дэбисхэр руу булимтаран ороһон япон эсэргүү дайсадые совет-монгол сэрэгүүдэй Халхин-гол дээрэхи Илалтын 85 жэлэй ойн баярта дашарамдуулагдаһан үдын буудалгын ёһололдо хабаадаһан байна.