Буряадай Гүрэнэй академическа опера болон баледэй театр соо уласай болбосоролой шэглэлэй ажалшадай августовска заншалта хуралдаан үнгэржэ, һуралсалай эмхинүүдэй хүтэлбэрилэгшэд, засагай зургаанай бүхы һалбариин түлөөлэгшэд, ниитэ эмхинүүдэй болон олондо мэдээсэл тараадаг эмхинүүдэй ажалшад бултадаа хабаадаа. Оросой Холбоото гүрэнэй һүлдэ тугай һайндэртэй  «Болбосорол – бүлэ - зорилгонуудай болон удхын нэгэдэл» гэһэн энэ хэмжээн тудажа, Эсэгэ орондоо үнэншэ хандалгын долгин доро үнгэрөө.

Буряад Уласай болбосоролой болон эрдэм ухаанай сайд Валерий Поздняков Арадай Хуралай һунгамалнууд багшанарай жэл бүриин августовска хуралдаанда иимэ олоороо хэзээдээшье хабаадаагүй, гэжэ онсолон тэмдэглээ. Арадай һунгамалнууд  уласай хуули баталалгын зургаанай түрүүлэгшын уялга саг зуура бэелүүлжэ байһан Баир Гармаев түрүүтэй багшанарые һуралсалай шэнэ жэлээр амаршалхаяа ерэхэдээ, ургажа ябаа эдиршүүлэй хүмүүжэл гүнзэгы удха шанартай, илангаяа манай       гүрэнэй ерээдүйе байгуулгада нүлөөтэй гэжэ тэмдэглээ бшуу.

 - Мүнөө манай болбосоролой байгуулалта һайжаруулагдана, эдэй засагай үндэһэн болон һуралсалай ябасын удха шанар шэнэдхэгдэнэ. Һүүлэй  долоон жэлэй туршада улас дотор 40 һургуули болон хүүгэдэй 40 сэсэрлигүүд  баригдаа, иимэ үйлэ хэрэгүүд уласай түүхэдэ хэзээдээшье  ушараагүй бшуу. Салин түлбэри дээшэлүүлгэ хадаа үшөө нэгэ шухала асуудал, энээн тухай  гүрэнэй Юрэнхылэгшэ өөрынгөө хандалгада анхарал табяа. Бүгэдэнэй мэдэһээр, 2014 оной сентябриин 1-һээ хүмүүжэлгын ажалай зүбшэлэгшэнүүдэй түлбэри дээшэлэгдэхэ, 2025 оной мартын 1-һээ 100 мянгаһаа дээшэ ажаһуугшадтай һуурингуудта кураторнуудта болон классай хүтэлбэрилэгшэдтэ салин түлбэри нэмэгдэхэ, - гэжэ Баир Гармаев мэдээсэбэ.

Түлбэриин гаршанууд бюджедэй нэмэлтэ мүнгэн зөөриин ашаар хараалагдаа, болоно. Мүн тиихэдэ багшанарай мүнөө бэлдэдэг тоосооной дансануудые үсөөрүүлхэ тухай ажал хэгдэжэ байһан тухай тодоруулагдаба.

 Хуралдаанда хабаадагшадые Буряад уласта сентябриин 5-6–ай үдэрнүүдтэ болохоёо байһан Байгалай болбосоролой IX-дэхи форумдо уриба.