«Земский доктор» гэһэн гүрэнэй программын шугамаар Хурамхаанай аймаг руу залуу шүдэнэй эмшэн Кирилл Майоров ерээ.

Кирилл Александрович 2018 ондо дунда һургуули дүүргээд, Шэтын гүрэнэй эмшэдэй академиин «шүдэнэй арга» гэһэн таһагай оюутан боложо, 2024 ондо дүүргээ.

«Би юундэ энэ мэргэжэл шэлээбииб? Би  гараараа юумэ бүтээхэ дуратайб, ямар нэгэ бүтээл байгуулха, зохёохы ажал хэхэ дуратайб. Шүдэнэй эмшэнэй ажал ходол багахан зүйлнүүдээр ехэ оролдосотойгоор, алдуугүй сэхээр бүтээхэ үйлэтэй ха юм. Би хүнүүдтэ туһалха дуратайб, ходол үнэн зүрхэнһөө анхаралтайгаар хандадагби.  Тиимэһээ багаһаа хүн зондо һайн юумэ хэхэ, аша туһатай байхые оролдодогби. Ехэ мүнгэ олзотой мэргэжэл шэлэхэ гэжэ зорилго өөртөө табяагүйб.Намда гол юумэн хадаа шанар, үбшэнтэндэ аятай, зохид болгохо,тэдэнэй ажаһуудал хүнгэн, үбшэнгүй болгохо зорилготойб. Манай ниигэмдэ хүниие хубсаһаарынь угтадаг, тиимэһээ хүнэй шүдэн нюурай шухала хуби ха юм. Гэхэ зуура, энэ мэргэжэл шэлэлгэ ухаандамни өөрөө ерэһэн мэдэрэл, мүнөө зүб шиидхэбэри шэлэжэ абаһан байгаа хаб, гэжэ этигэнхэйб, - гэжэ Кирилл Майоров хөөрэбэ.

Тиигэжэ залуу мэргэжэлтэн Хурамхаанай аймагай түбэй больницын шүдэнэй эмшэнээр июлиин 22-һоо ажалайнгаа харгы эхилээ.

Залуу эмшэнэй тэмдэглэһээр, аймагай энэ эмнэлгын газарта дүршэл ехэтэй эмшэдэй болон эмнэлгын мэргэжэлтэдтэй ажаллахадаа, тэдэнэй найдамтай дэмжэлтэ, дүршэлэй туһа ходол бэедээ үзэжэ байдаг юм.

Элүүрые хамгаалгын шэглэлэй эмнэлгын эмхинүүдые мэргэжэлтэ ажалшадаар хангалга хадаа Оросой Холбоото Уласай Юрэнхылэгшэ Владимир Путинай үүсхэһэн «Элүүрые хамгаалга» гэһэн үндэһэн түсэлэй гол шэглэлнүүдэй нэгэн гээшэ.