Агын Буряадай тойрогто үнгэрхэеэ байһан һур харбалгаар Россиин ехэ урилдаанай хэмжээнүүдэй шугамаар  Нээмэл түхэлэй «Руно» гэһэн ажахын дэбисхэр дээрэ «Агын сагаан Алтан» гэһэн хони хайшалаанай ехэ һайндэр үнгэргэгдэбэ. Хараалагдаһан олон хэмжээнүүд соо ехэ һонин, анхарал татамаар ушар  эмхидхэгдээ.

Анхан сагта асари томо колхоз совхозууд үй түмэн хонин һүрэг үсхэбэрилдэг бэлэй. Зунай сагта эдиршүүлһээ эхилээд, үндэр наһатайшье нютагайхид хони хайшаалаанда эдэбхитэй хабаадулагдадаг байгаа.  Тиигэжэ хүдөө нютагай үхибүүд сүлөө сагаа аша туһатай ажалаар үнгэргэдэг һэн. Эгээл тиигэжэ балшар бага наһандаа хони хайшалжа үндыгөөд, дүй дүршэлтэй болоһон залуушуул Бүхэроссиин хони хайшалаанай мүрысөөнүүдтэ амжалта түгэс хабаададаг байгаа.

«Агын сагаан Алтан» гэһэн һайндэртэ  түүхэдэ ороһон суутай абгайнар уригдаа. Ушар юуб гэхэдэ, 1963 ондо Волгоградай областиин  "Привольный" гэһэн совхозой дэргэдэ Бүхэроссиин 3-дахи ехэ харалган үнгэргэгдөө. Тэрэ хэмжээндэ Шэтын областиие түлөөлжэ Агын дүрбэн залуухан басагад ошоһон юм ха. Эдэ абгайнар хэд бэ, гэхэдэ, Цыжипова Цыпелма, 1941 ондо, Цындыма Жигмитова, 1942 ондо, Самбуева Цыжидма, 1946 ондо, Чимитова Любовь, 1941 ондо түрэһэн намтартай. Энэ дээрэ үгтэһэн дүрэ 1963 ондо "Овцеводство" гэһэн сэтгүүлдэ хэблэгдэһэн байна.

Шэтын областиин илагша –Любовь (Шойсалма) Чимитова оренбургын гэһэн сууда гараһан онол аргаар 19 минута 39 секундын туршада 6 толгой хони хайшалжархиһан байна. Шойсалма абгай гал дүлэтэ 1941 ондо Агын аймагай Согто-Хангил нютагта түрэһэн юм. Бүхэли наһандаа  колхоз миллионер гэжэ суурхаһан 22-дохи партсъездын нэрэмжэтэ Согто-Хангил нютагтаа жолоошоноор ажаллаа. Түргэн шударгы эрэлхэг эгэшэ түргэн туһаламжын албанай жолоошоноор хүдэлһэн юм.