Үзэсхэлэн һайхан байгаалитай үшөө нэгэ газар-Хурамхаан аймаг тээ мэндэ үнгэрһэн уласхоорондын аяншалгын үзэсхэлэндэ буряад эвенк яһатанай  уран гартанай гайхашаг зүйлнүүдтэй танилсуулба. Үзэсхэлэнэй улаан талмай дээрэ Хурамхаанай аймагай нэмэлтэ һуралсалай Түбэй майхан холоһоо нюдэндэ тороно.

- Гол түлэб эндэ манай Гандан Шэдублинг дасанай лама Олег Намжиловай бэшэһэн номууд дэлгээтэй. Олониитэдэ мэдээжэ лама һонирхолтой  буддын шажанай мэдэсэнүүдтэеэ хубаалдадаг. Сагаалганай урда тээ бүхы буряад угсаатанай зурхай дэлгэрэнгыгээр зуража бэлдэдэг юм. Манай ламанарай бүтээһэн табан аршаан, бэеын махабадта массаж хэдэг тоһон гээд энэ шэглэлээр һонирходог зондо хэрэгтэй зүйлнүүд, - гэжэ Хурамхаанай аймагай нэмэлтэ болбосоролой Түбэй багша Анна Будаева мэдээсэбэ.

Хурамхаанай аймагай Алла һуурингай “Юктэ” гэһэн эвекнүүдэй түбые Дашима Бирилтуева түлөөлбэ.

- Би өөрөө  буряадби, нүхэрни тэбкегер угай эвенк-түнгүүс яһатан. Мүнөөдэрэй энэ хэмжээндэ манай уран гартай оёдолшон Елизавета Баировна Будаевагай бүтээлнүүдые асарааб. Бэлигтэй багша өрөө элдэб зүйлнүүдые бүтээдэг, манай түбтэ үхибүүдые  уран урлалай оёдолдо һургадаг. Эндэ шабинарайнь ажалнууд баһал дэлгэгдэнхэй. Эдэ ажалнууд наймаанай бэшэ, үзэсхэлэнэй зүйлнүүд гээшэ, - гэжэ Дашима  Цыбикова хөөрэбэ.

Үзэсхэлэнэй нэгэ буланда  Улюнхан һууринда оршодог нэмэлтэ болбосоролой “Давдын” гэһэн түбэй табиһан зүйлнүүд.

- Үхибүүдые үндэһэн арадайнгаа ажаһуудал, уран урлалтай танилсуулжа, хэлэндэ һургажа, угаа дамжуулжа, өөрыгөө иимэ эвенк яһатан байһыень мэдүүлжэ, хүгжөөхэ гэһэн зорилго табинхайбди. Үхибүүд ехэ һонирхолтойгоор хэшээлнүүдтэмнай ябадаг, дуратайгаар элдэб гоёлто сувенирнүүдые бүтээдэг, - гэжэ Марина Раднаева хөөрэбэ.

 Марина Батуевнагай хэлэһээр, энэ түбэйхид багахан гар бэлэгһээ томо хубсаһан болотор элдэб зүйлнүүдые бүтээжэ, наймаанда табидаг. Олоһон мүнгэн зөөреэр Ямал, Саха Яхадһаа  оро бугын арһа нооһо худалдан абажа, шэнэ бүтээлнүүдые хэдэг юм. Сэхыень хэлэхэдэ, энэ юрын мэдээсэл бага яһатанай гүнзэгы орёо асуудалтай хэсүүхэн байдал гэршэлнэ. Хэр угһаа хойшо  оро үсхэбэрилжэ, амидаржа байһан арад угсаата ажаһуудалаа алдаһаниинь  гүрэн түрын хүсэлдүүлшэгүй алдуу болоно ха юм.