Буряад Уласта үнгэргэгдэһэн "BaikalTravel Mart-2024" гэһэн уласхоорондын аяншалгын үзэсхэлэндэ Захааминай аймагайхид хабаадажа, уран гартанаар баян улад байһанаа гэршэлээ. Үзэсхэлэнэй гол үзэмжэдэ Билигто Тарбаевай бүтээлнүүд шэмэг болон табигдаатай. Билигтын наһанайнь нүхэр Лидия Семеновна аймагайнгаа уран гартан тухай мэдээсэбэ.
- Манай аймагта олон уран гартан бии. Булта түрэл һайхан тоонто нютагтаа дурланхай, бүтээлнүүдтээ үзэсхэлэнтэ һайхан байгаалияа, суута газарнуудаа түүрээн зураглан харуулдаг юм. – гэжэ тэрэ хөөрэбэ.
Дотоодын хэрэгүүдэй таһагта Билигтэ эрхим ажаллаад, наһанайнгаа амаралтада гарахадаа, өөрынгөө хүсэлжэ һанажа ябаһан юумэеэ бэелүүлээ. Хара багаһаа уран гартай абынгаа бүтээлнүүдые хаража, сүлөө сагтаа хамһалсажа байхадаа, угаараа дамжуулагдаһан бэлигээ улам бэхижүүлээ гэлтэй. Табан жэлэй саана эхилжэ, аймагайнгаа хүгжэлтэдэ аяншалгын шэглэлээр олон гайхамшаг бүтээлнүүдые байгуулжа, элдэб харалгануудта амжалтатай хабаадана, грантын дэмжэлтэнүүдтэшье хүртэнэ.
Санагын хүүгэдэй уран урлалай һургуулиин зурагай багша Алтына Намсараева энэ үзэсхэлэндэ аймагаа түлөөлжэ, хоёр хүбүүдээрээ ерэнхэй.
- Манай һургуулиин һурагшад ехэнхидээ Буряад зураг гэһэн онол аргаар зурагуудые зурадаг. Эндэ дэлгэгдэһэн зүйлнүүдэй олонхинь минии шабинарай ажал гээшэ, - гэжэ Алтына Леонидовна уран бүтээлнүүдтэй танилсуулба.
Энхэ Баяр гэжэ хоёр хүбүүдынь Захааминай аймагай үзэсхэлэниие хуурай ая хүгжэмөөр шэмэглэбэ. Эдэ хоёр хүбүүд Монголын хүгжэмшэн Нямдорж Нацагдоржын шабинар, онлайн аргаар хэшээлнүүдээ абадаг юм.
Комментарии