Baikal travel mart гэһэн уласхоорондын аяншалгын үзэсхэлэндэ Зэдын аймаг эгээл олоороо эдэбхитэй хабаадаа. Үглөөгүүр энээ руу ерээд ябахадаа, Зэдын аймагай дэлгэһэн майхан үзэсхэлэнэй гол талмай гээшэ гү гэжэ һанахаар байгаа. Эндэ тон үргэнөөр элдэб уран урлалай, уран барималай, дурасхаалай сувенирнүүдэй бүтээлнүүд дэлгэгдэбэ. Арһаар оёһон зүйлнүүд, үзэмжэ һайхан гоёлтонууд, малгай, хубсаһан гээд олоной анхарал татаа. Үзэсхэлэнэй гол талада томо гэгшын Боргойн хониной дүрсэ табяатай, холоһоо сайран харагдахадаа, эндэ Зэдын аймаг хабаадана гэжэ эли тодо байгаа бшуу. Боргойн хониной амтатай мяхан болон адуу малай мяхан эдеэнэй зүйлнүүд харагшадые һонирхуулаа. Дуу хатар, наада дэлгэгшэдэй дунда Зэдын аймаг баһал шалгараа гэхэдэ алдуу болохогүй. Уран гоёор оёгдоһон элдэб янзын үндэһэн арадай хубсаһатай артистнарай наадан бүгэдэндэ һайшаагдаа. Үзэсхэлэнэй түгэсхэлдэ харалганай дүнгүүдые согсологдожо, Зэдын аймаг түрүү һуури эзэлээ гэжэ соносхогдоходонь, шүүгшэдшье бэшэ, юрын зон энэ мэдээсэл гайхангүй тодожо абаа. Зэдынхидэй илалта үнэн бодото сэгнэгдээ бшуу.
Комментарии