Иимэ үгэнүүдээр Хяагтын аймагай Муроча нютагай толгойлогшо Сергей Юрултуев хөөрэлдөөгөө эхилбэ.

Baikal travel mart гэһэн уласхоорондын аяншалгын үзэсхэлэндэ Хяагтын аймаг түлөөлэгшэдэй дунда Муроча нютагайхид хабаадалсаа.

-   Манай нютагай дэбисхэр дээрэ Оросой Холбоото Уласай эгээл түрүүшын дасангуудай нэгэн болохо дасан оршодог. Ехэ томо дасан гээшэ, 40 ламанартай юм. Манай нютагай үшөө нэгэ омогорхол хадаа хабсагай дээрэ өөрөө бии болоһон Арьяа Баала Ранжуун  «Ом маани бадмай хум» гэһэн маани. Энэ гайхамшаг үйлэ олон һүзэгшэдые һонирхуулдаг, - гэжэ Сергей Владимирович хөөрэбэ.

Мүнөө сагта нютаг ороноо хүгжөөжэ, хүрэнгэ оруулагшадые һонирхуулха арга боломжонуудые бэдэрнэ. Нютагай өөһэдын хүтэлбэриин эмхинүүд эдэбхитэй ажал ябуулдаг байна. Толгойлогшын хэлэһээр, нютагайхид оршон тойронхи газар дэбисхэрээ ариг сэбэр байдалда сахижа, бүхы шадалаараа нютагаа һайжаруулхые оролдодог.Олоной хүсөөр һэеы гэр баригдажа, зошод буудалай байшан баряа. Энэ хэрэг бүхыдөө 700-гаад мянган түхэриг гаргашалагдаа. Тиигэжэ нютагаа аяншалагшадые һонирхуулха, нютаг газараа хүгжөөхэ ажал ябуулна.

- Манай нютагай зон ажалша бэрхэ даа. Томо һургуулитайшье һаамнай, һурагшаднай үсөөн. Гэбэшье үхибүүд амжалтатай һурадаг. Манай нютагһаа Дэлхэйн хоёр абарганууд урган гараһан байна. Эдэ хадаа Александр Соктоев болон Алексей Зудаев хоёр манай омогорхол, ургажа ябаа эдиршүүлдэ ёһотойл жэшээ боложо үгэнэ. Айлшаар ерэгты, манай Хяагтын аймаг руу, - гэжэ Сергей Юрултуев уряалба.