Буряад Уласай Загарайн аймагай олон хүүгэдтэй гэр бүлэ Бүхэросиин «Жэлэй бүлэ-2024» гэһэн можын шатын харалганда түрүүлбэ.

Энэ бүлэдэ зургаан үхибүүд хүмүүжэлэгдэнэ. Гэрэй эзэн – Баир Валерьевич өөрөө Түнхэнэй аймагһаа уг гарбалтай, 5-дахи зэргын электрогазосварщик мэргэжэлтэй, бутаргадаг түхеэрэлгын оператораар ажалладаг. Сүлөө сагтаа «hээр шаалган» гэһэн буряадай үндэһэн арадай тамирай шэглэлээр ехэтэ һонирхожо, бэеэ һоридог байна.

Олон хүүгэдтэй эжы Галина Баинжаргаловна Хориин аймагһаа гарбалтай, биологиин, ажалай багша болон логопедээр мэргэжэлтэй багшын ажалай 18 жэлэй дүршэлтэй. Һүүлэй гурбан жэлэй туршада «Лесенка успеха» гэһэн хубиин хүүгэдэй сэсэрлигтэ хүмүүжэлгшээр ажаллана. Галина Буинжаргаловна алишье талаар бэлигтэй хүн, волейболоор Хориин аймагай суглуулагдамар командын эдэбхитэй гэшүүн, 2019 ондо Улаан-Үдэдэ үнгэрһэн столой тениссээр хүрэл шанда хүртэһэн юм. Мүн дартсаар һонирходог. Мүн шүлэг зохёожо, амжалташье туйлаһан байна. Гэхэ зуура Хориин аймагай Баян-Гол һууринай дэргэдэхи Будда Шэгэмүүниин дүрсэ бүтээлгын эдэбхитэн юм.

- Манай ехэ хүбүүн Санжа 16 наһатай. Һургуулидаа волейбол наададаг, бүхэ барилдаанда ябадаг. Мүн һургуулиин болон аймагай олимпиадануудта эрхим хабаададаг, «Потомки Пифагора» гэһэн Бүхэроссиин тоо бодолгын наадан-харалганай III шатын дипломоор шагнагдаһан, - гэжэ олон хүүгэдтэй түрэлхид хөөрэбэ. - Юмжаннамнай 14 наһатай, баһал тамиршан, волейбол, баскетбол болон тамирай гимнастикаар бэеэ амжалтатайгаар һоридог. Уран үгын уласай харалганай 1 шатын дипломоор тэмдэглэгдэнхэй.

Арба нэгэтэй Аяна басаганиинь баһал эжы абын омогорхол даа. Улаан-Үдэ хотын Звездый гэһэн тосхоной 10-дахи хүүгэдэй урлалай һургуулиин «Арс» гэһэн хатарай ансамбльда хатардаг. «Музыкальная метелица» гэһэн Бүхэроссиин телевизионно харалганай 1-дэхи шангай лауреат. Гурбадахи классай Буянта «Россия – Родина моя» гэһэн экологиин Бүхэроссиин олимпиадын илагша. 6-тайхан Максар, 2-тойхон Баатар дүү хүбүүдтэеэ наадаха угаа дуратай юм.

- Бидэ бүлөөрөө аяншалха дуратайбди, зундаа хоёр дахин Байгал амархаяа ошодогбди. Сагаалганай болон зунай Обоогой нааданда  ходол  эдэбхитэй хабаадададгби. Гэр бүлэмнай бидэндэ хизааргүй инаг дуран, дулаахан хандаса, арюухан байдал үгэдэг, - гэжэ Галина эжы хубаалдаба.