Наһатайшуулые болон эрэмдэг зонуудые ниигэмэй талаар хангадаг байрада үдэртөө байдаг таһаг нээгдээ.

Шэнэ нээгдэһэн энэ таһаг хара үглөөнһөө үдэшэ болотор ажалладаг, нэгэ дороо 15 хүн харууһалагдаха аргатай. Эндэ  «хүүгэдэй сэсэрлиг» гэһэн түхэлөөр ажалладаг. Эрэмдэгүүд гү, али наһатай хүнүүдэй түрэлэйхид хэлсэһэн сагтаа асараад, тогтооһон сагта гэртээ абаашадаг. Энэ хамһабариин таһаг долоон хоногой табан үдэр хүдэлдэг.

- Иимэ түхэлэй таһаг байгуулга үнинэй шухала болоһон байгаа, дүтын түрэл болон залуушуул өөһэдынгөө түрэлхидөө, хүгшэн аба эжыгээ наашан асаржа байхадань болохо. Тэдэнэй ажалдаа байгаа сагтань һайн харууһан, эдеэ хоол аятай зохёогдонхой. Таһагта үдэртөө байха болон элүүржүүлгын туһаламжа олгуулхаһаа гадуур  эрэмдэг зониие харууһалдаг зон үдэрэй хэдыхэн сагай туршада асаржа, өөһэдөө “ниигэмэй амаралта” абаха аргатай, эрэмдэгүүд  үбшэнэйнгөө шалтагаар гээһэн ажаһуудалай дүршэлөө хүгжөөжэ, элүүржүүлхэ аргатай бшуу, - гэжэ ниигэмэй талаар хамгаалгын Яаманай эмхиин захирал Наталья Айдаева мэдээсэбэ.

Таһагта бэеын махабад элүүржүүлгын бүхы түхеэрэлгэнүүд бии. Дабһанай таһаг, сауна болон бэеэ һоридог тренажернуудтай тамирай танхим ажалладаг. Эндэ ажаллуһалагдажа байгшад сүлөө сагаа өөрынгөө дураар үнгэргэдэг. Элдэб наадан, уран баримал, оёдол болон элдэб  гарай хүдэлсэ хүгжөөдэг даабаринуудые бэелүүлдэг.  Хэн бэ даа эндэ юрэ оёдолдо һурана, зарим зонууд уран оёдолоор, уран зурагаар гайхамшаг бүтээлнүүдые байгуулдаг.

Таһагай ажалай гаршагта дуу дуулаха, хатарха болон хүгжэмэй зэмсэгүүдээр наадаха аргатай. Энэнь наһатайшуулда угаа һайшаагдадаг. Пансионадта долоон хоногой нэгэ удаа мэргэжэлтэ болон һайн дуранай артистнар, үхибүүд ерээд, наадаяа дэлгэдэг. Үдэртөө байдаг зонууд баһал эдэ хэмжээнүүдтэ хабаадуулагдаха аргатай.

Үндэр наһатай болон эрэмдэгүүдэй «НАРАТА» гэһэн пансионат 2023 ондо «Демография» гэһэн юрэнхылэгшын үндэһэн түсэлэй зөөреэр наһатай болон эрэмдэг зонуудые удаан сагта харууһалгын гурим байгуулгын шугамаар баригдаа. Наһатай зоной болон эрэмдэгүүдэй ниигэмэй дадалга гарадаг харилсаанай, сүлөө сагаа һонирхолтойгоор үнгэргэхэ түб боложо үгэнэ гэбэл алдуугүй. Гэхэ зуура, тус эмхи эршэм хүлгөөтэй энэ сагта  алишье талаар аша туһатай болоно бшуу. Энэ  асуудалаар 8 (3012) - 37-83-23 - гэһэн утаһаар хонходоходо болоно.