Хориин аймагай захиргаанай ниигэмэй талаар хамгаалгын таһагай эмхидхэһэн “Минии бүлын жаргал” гэһэн хэмжээн Уласхоорондын гэр бүлын һайндэртэ зорюулагдаба.

Байгша ондо алтан түрэеэшье тэмдэглэһэн болон хуби заягаа ниилүүлһэн залууханшье  бүлэнэр ёһологдобо.

- Гэр бүлын жэлдэ бидэ аймагайнгаа омогорхол болоһон жаргалтай бүлэнэрые ёһоороол тэмдэглэбэбди. Эдэнэрнай  олон жэлнүүдтэ найдамтай бүлөөр ажаһуужа, мүнөө үеын залуу бүлэнэртэ бодото жэшээ боложо үгэнэ бшуу, - гэжэ ниигэмэй хамгаалгын таһагай дарга Дарима Будаева мэдүүлбэ.

Баяр баясхалан оршон байдалда ёһолуулагдаһан зонуудай дунда Павел Галсанович, Дулма Дамдиновна Нимаевтан. Эбтэй эетэй энэ бүлэ 60 жэлэй туршада сугтаа ажаһууна. Гэрэй эзэн Баруун Хасуурта һууринда механизатораар бүхэли наһандаа ажаллаа. Харин найдамтай нүхэрынь Хориин ОРС-ын эдеэ хоолой наймаашанаар хүдэлһэн байха юм. Суг хамта ажаһууһанай хугасаада жаргалтай бүлэ байгуулаа, гэр баряа, үхибүүдээ тэжээгээ.Булум нютагай Даши - Цырен Цыбенович Бадма-Цыцык Тыхеевна Дондоковтан суг хамта дүрбэн хүүгэдые хүмүүжэлээ. Хүдөө ажахын эрхим хүдэлмэришэ бүлэ бултанһаа  эгээл түрүүн гэр бүлын хүдөө ажахын хубиин ажахы – КФХ байгуулһан юм.  Степных Александр Иннокентьевич  Галина Николаевна хоёрой бүлэ хоёр хүүгэдтэй. Олон жэлнүүдэй туршада үмсын хэрэг эрхилһэн, «Жэшээтэ гуримтай гэр» гэһэн  тэмдэг шагналда хүртэһэн, нютагайнгаа зоной дунда жэшээ боломоор хүндэтэй айл юм.

Василий Жимбуевич Бальжиновай болон Цындыма Дымбрыловна Дашинимаевагай бүлэ хоёр хүбүүдые хүн болгоо. Гэрэй эзэн 27 жэлэй туршада түймэр саралганай албанда үнэн сэхэ алба хаагаа. Цындыма Дымбрыловна  олон жэлнүүдэй туршада Аймагай болбосоролой хүтэлбэридэ ажаллаһан намтартай. Тэдэнэр һургуулида суг һураһан нүхэд  тухайгаа болон угай һабагша тухай номуудые бэшэжэ, хэблэһэн байна.

 Мүн энэ үдэр Аюр Надежда Субботинай бүлын гэрлэһэнэй баяр ёһолол үнгэрөө. Залуу бүлэдэ «бриллиантын» түрэеэ тэмдэглэжэ байһан Павел Галсанович болон Дулма Дамдиновна хоёр үреэлэй һайхан үгэнүүдые  зорюулба. «Хориин аймаг» нютагай засагай байгууламжын хүтэлбэрилэгшэ Булат Алексеевич Цыремпилов болон ажаһуугшадые ниигэмэй талаар хамгаалгын Таһагай дарга Дарима Батомункуевна Будаева хоёр залуу бүлые амаршалжа, дурасхаалай бэлэгүүдые барюулаа. Мүн лэ баярай бэшэгүүдээр ойн баяраа тэмдэглэжэ байһан бүлэнэр тэмдэглэгдээ.

Мүн лэ энэ баярай һайндэрэй хүндэтэй айлшадай тоодо тусгаар сэрэгэй үйлэнүүдтэ хабаагша сэрэгшэн Андрей  Викторович Попов болон Эржэна Найдановна Шойжилова хоёрой бүлэ мүн. Энэ бүлэ өөһэдынгээ ажаһуудалаар инаг дуран болон энэрхы һайхан хандаса дээрэ үндэһэлһэн гэр бүлэ байһанаа гэршэлээ бшуу. Тэдэнэр ганса өөһэдынгөө хүүгэд, аша зээнэртэ бэшэ, мүн тэдэниие мэдэхэ зондо ёһотойл жэшээ болодог юм.

 - Өөһэдынгөө дүрбэн хүүгэдые хүмүүжэлэн тэжээгээд, үшөө табан хүүгэдые хүмүүжэлхэеэ абанхайбди. Үхибүүднай – манай омохорол гээшэ, үхибүүн бүхэмнай эрдэни мэтэ сэнтэй бшуу, - гэжэ Андрей Викторович тэмдэглээ.

- 50 – 60 жэлнүүдэй хугасаада эдэ бүлэнэр бэе бэедээ хүндэтэй хандасаяа, найдалаа, инаг дураяа гамнажа шадаад, ёһотойл жаргалтай, эбтэй бэхи бүлэ байһанаа гэршэлнэ. Бүлэ бүхэндэ энэ үдэр түрэл гаралынь, үри хүүгэдынь, хүршэнэрынь, суг ажалладаг нүхэдынь болон аймагай хүтэлбэрилэгшэд дулаахан үгэнүүд зорюулаа.