Соёлой мэргэжэлтэд хүдөө нютаг руу нүүхэнь гү?

Оросой Холбоото Улас дотор 2025 онһоо «Хүдөөгэй соёлой ажалшан» гэһэн программа ажаллажа эхилхэ.

Буряад Уласай хүдөө нютагууд болон багахан тосхон руу ажаллахаяа нүүжэ ошохо соёлой мэргэжэлтэн 2 сая түхэригэй хэмжээнэй түлбэри нэгэ дары абаха аргатай.  Түлбэридэ хүртэгшын шиидхэбэреэр энэ тэдхэмжын түлбэри гэр байра, авто унаа худалдажа абалганда болон бусад хэрэглэлнүүдтэ гаргашалагдаха аргатай. Гэхэ зуура «Хүдөөгэй соёлой ажалшан» гэһэн программада хабаадагшад ажалай хэлсээ баталһан үдэрһөө эхилээд, 5 жэлэй туршада ажалаа энэл хүдөө газартаа бэелүүлхэ уялгатай.

- «Хүдөөгэй соёлой ажалшан» гэһэн программа бэелүүлгын шугамаар 5 жэлэй туршада манай улас дотор 580 мэргэжэлтэд хэрэгтэй, тэдэнэй тоодо   соёлой сүлөө сагай эмхинүүдэй 292 мэргэжэлтэд, хүүгэдэй урлигай һургуулинуудта 117 мэргэжэлтэд, номой сангай 163 мэргэжэлтэд болон музейн 8 ажалшад хэрэгтэй болохо, - гэжэ Буряад Уласай соёлой сайд Соелма Дагаева мэдээсэнэ.

Шэнэ нэбтэрүүлэгдэхэ тус программа  гүрэн дотор  бэелүүлэгдэжэ байһан «Хүдөөгэй эмшэн» болон «Хүдөөгэй багша» гэһэн программануудтай адлил эрхэ нүхэсэлөөр  ажаллагдаха. «Хүдөөгэй эмшэн» гэһэн программа 2012 онһоо бэелүүлэгдэнэ, харин «Хүдөөгэй багша» - 2020 онһоо ажаллажа эхилэнхэй, гээд һануулая.