Фашис булимтарагшадай Эхэ Орондомнай дай баадхахадань, манай Санага нютагай олон тоото хүнүүд Эсэгэ Ороноо хамгалхаа жагсаа бэлэй. Тэдэнэй нэгэниинь тэрэ үеын комсомолец Бадма Очирович Доржиев болоно.

Дайн байлдаанай эхилхэдэ арбан зургаатай байгаашье haa, 1943  ондо өөрын hайн дураар дайсаниие сохилсохоожагсаалда зогсоо. Шэтэ – 2 станциин дэргэдэ дайсаниие яажа сохихо тушаа hургуули хэжэ, сэрэгшын мэдэхэ ёhотой элдэб шадабари гэхэ гү, онол арга оложо абаад, баруулжаа дайсаниие сохихоор мордоо бзлэй.

«Yдэршье, hүнишье дайсаниие сохихо, тэдэниие алхамшье уригшань ябуулхагуй!» гэhэн Верховно главнокомандующиин захиралта дүүргэн, түрүү оборонодо байжа, наашаа дугтаhан фашистнуудые алхамшье урагшань ябуулангуй сохилдоо. Тиигэжэ тулалдахадаа, ехэ гээлтэ, хоролтодо орожо, нэгэ мэдэн гэхэдээ, бүхэли рото сэрэгшэдhээ оройдоол найман сэрэгшэ үлөөд байхадаа, Бадма Очирович хүлhөө бууhан нүхэдөө шаналан, уйдхар гашуудалда абтахаараа болоо бэлэй.

Бадма Очирович аха дүү белорус арадай газарые фашис булимтарагшадhаа сүлөөлхын түлөө асари ехэ добтолгонуудта хабаадажа, олон город ба hууринуудые дайсадhаа сүлөөлэлсөө. Белоруссиин столица Минск городые сүлөөлхын түлөө болоhон хэды олон тулалдаануудта хабаадаа.

Тиигэжэ Бадма Очирович 1944 оной асари ехэ добтолгонууд соогуур фашистнуудые hүнөөлсэhөөр, хэдэн дабхараар бэхижэлэгдэhэн хэрэм – город Кенигсбергын хатуу шанга байлдаануудта хабаадаа.

Кенигсбергын үйлсэнүүдые гартаа оруулхань тон хэсүү байгаа. Ямар нэгэн ордон гартаа оруулхадашни, газар дороhоо гараhандал фашистнууд сохилдожо орохо. Иигэжэ Бадма Очирович  удаан саг соо хүлеэгдэhэн Илалтые Кенигсбергын үйлсэнүүдтэ угтаhан юм.

Бадма Очирович хоер дахин шархатаhан ба нэгэ удаа контузи абаhан бэлэй. Дайнай hүүлдэ Омскодо түмэр замай сэрэгтэ алба хээд, 1950 ондо армиhаа табигдаhан юм.

Дайн байлдаанай баатаршалгануудые харуулhанай түлөө Бадма Очирович «Шэн габьяагай түлөө», «Минскые сүлөөлэлсэhэнэй түлөө», «Кенигсбергые абаhанай түлөө» гэhэн дайшалхы медальнуудаар шагнагдахаhаа гадна элдэб ойдо зорюулагдаhан зургаан медальнуудтай.

Манай мүнөөдэрэй жаргалта ажаhуудалай түлөө  ами наhаяа гамнангүй фашистнуудые сохилсоhон Бадма Очирович Доржиевые хэтэ мүнхэдөө сээжэ зүрхэндөө хадагалжа ябахабди.