Цыренгармаева Дулмажап Санжиевна

Тγγхэ домогоор, бэлигтэй хγбγγд, басагадаараа суурхаhан Баян- Хаан, Баярдааша, Хантинаата, Уула, Ошор-Ваани, hама-Лари, Бажагар обоонуудаар хореологдонхой, гγн тунгалаг hутай голhоо ундатай Тугэнын талын тэг дунда оршодог Нарhата нютагта ажалша бэрхэ, альганай шэнээн бγдөөр захатые бγтээжэ шададаг, нигγγлэсхы боди сэдьхэлтэй, нютаг нугынгаа ажабайдалда бγхы hанаан сэдьхэлээ γгэжэ ябадаг олон жэлдэ hутайн hургуулиин директэрээр ажаллаhан Дулмажап Санжиевна Цыренгармаева ажаhууна.

 Дулмажап Санжиевна 1946 оной январиин 2-то тγрэhэн намтартай.

 Эсэгэ ороноо хамгаалгын Агууехэ дайнай шэрγγн жэлнγγдай хойно тγрэhэн хадаа бага наhанγаа ажабайдалай халуун хγйтэниие γзэhэн, тиимэhээ хγниие хайрлаха, дγмэхэ мэдэрэлтэй, хγндэ шадал соогоо ходо туhалха гэжэ оролдодог.

 Багаhаа хойшо hγбэлгэн шуран ябаhанайнгаа ашаар Тγгэнын дунда hургуули эрхимээр дγγргээд, Эрхγγгэй гγрэнэй университедэй хэлэ бэшэгэй факультедтэ hурахаяа ороо. Тэндэ hуража байхадаа, наhанайнгаа хани нγхэр Владимир Будажаповичтай (мγнөө авиациин подполковник) хуби заяагаа ниилγγлжэ,айл бγлын шэнэ гуламта байгуулаа. Хани нγхэрынь мэргэжэлээрээ сэрэгшэ hэн тула, холын гарнизоонуудаар алба хэхэдэнь, харгыдань хани, гэртээ тулгань боложо, амаралтада гаратарань ябалсаа.

 Тиигэжэ Хабаровск хотоhоо тγрэл hайхан тоонто нютагаа бусажа ерээд, 1992 онhоо hутайн дунда hургуули хγтэлбэрилөө.. Дулмажап Санжиевнагай директорээр хγдэлhэн γень манай гγрэн дотор тохеолдоhон эгээл хγшэр сагтай холбоотой.

 Дулмажап Санжиевна hургуулида хэрэгтэй бγхы юумээр хангахые оролдоо. Зуугаад шахуу hурагшанартай hургуули трактортай, хγнгэн унаатай, хэшээлдэ хэрэглэхэ бγхы хэрэгсэлнγγдтэй, оедолой хэдэн машинатай. Багша бγхэн hаруул сэбэр, дулаан кабинет соо ажжалаг гэжэ хэды шэнээн ябадал гаргааб.

 Багшанартайгаа, hурагшадтайгаа хамта нютагайнгаа тγγхэ байгаалиин хγшөөнγγд тухай материал суглуулжа, hургуулидаа музей нээhэн, хэдэн удаа хари гγрэнэй аяншадые γндэр дээрэ угтаhаншье. Номой сангай жаса hайжаруулаа, багша бγхэниие hуралсалдаа хэрэглэхэ методическэ журнал ба газетэнγγдтай болгоо.

 Ехэ оролдолго гаргажа, 1993 ондо hутайн hургуулиин 75 жэлэй ойн баяр эмхидхээ. Hутайн hургуули тγгэсэhэн 300 гаран хγн уулзалгада сулгаржа, бэе бэетэйгээ харилсажа, хэды шэнээн зγрхэ сэдьхэлээ ханааб, баярлааб.

 Эсэгэ ороноо хамгаалгын Агууехэ дайнай 60 жэлэй ойн баярта дайнда хабаадаhан нютагайнгаа баатар хγбγγдтэ хγшөө бодхооходо, Дулмажап Санжиевнагай γγргэ ехэ.

 Мγнөөшье хадаа Дулмажап Санжиевна нютаг соого эгээл хγндэтэй хγн юм. 2011 онhоо хойшо нютагайнгаа Гулваа болонхой.

Балданова С.С. – учитель бурятского языка