Хүндэтэ  Светлана Добчиновна "Доодо-Бухэн" гэhэн захиргаанай гулваагаар, ТОСой ударидагшаар хүдэлhөөр, урма зоригтойгоор олон дабаануудые дабан гарахыетнай хүсэнэбди. Иимэл урагшаа эрмэлзэл ехэтэй зон Гуа сэсэн хатануудай нэрэ зэргэдэ хүртэхэл ёhотой гэжэ hанахаар ха.

"Эрхим ударидагша"
Хүн болохо багаhаа
Хүлэг болохо унаганhаа
 
1946 оной үбэлэй эхин…Эгээл энэ hарада Сэлэнгын аймагай Харгана нютагта Алтан уулын хойморто  бурьялма долгитой Бүхэн голой наанахана Дашацыренэй Добшон Гомбын Дашацырма хоёрой бүлэдэ долоон үхибүүдэй одхон басаган Света алтан дэлхэй дээрэ түрэhэн намтартай Түрэхын ухаансар hүбэлгэн басаган hургуулида hурахадаа бэрхэ hэн тула, hургуулиингаа классhаа гадуур ажалда хам оролсожо, багшанартаа туhалалсажа ябагша hэн. Үхибүүн хаhадаа эхэ эсэгэhээн эртэ гээгдэбэшье аба мэтэ аханараа, эхэ мэтэ эгэшэеэ дахаhаар hургуулияа эрхимээр дүүргээ бэлэй.

Эгэшынгээ оюутан ябаха хаhадань туhалжа, ажалай түрүүшын алхамуудые хэжэ эхилээ hэн. Харганаа нютагайнгаа залуушуулые ударидажа, комсомолой эмхиин секретаряар hунгагдаhан байгаа.

Эндэ хүдэлжэ байха үедөө партиин гэшүүндэ абтаа hэн. Бэрхэ ударидагша, урагшаа тэгүүлдэг зантай хадань Сэлэнгын райкомдо дэбжүүлэгдэhэн байгаа. Хэдэн жэлдэ хүдэлhэнэйнгөө hүүлдэ Эрхүүгэй гүрэнэй университедэй түүхын таhагай оюутан боложо, hуралсалаа үргэлжэлүүлээ бэлэй. Дээдэ hургуулияа эрхимээр дүүргэжэ, гартаа диплом абахадаа нютагайнгаа хүбүүн Жаргалтай хуби заяагаа ниилүүлэн айл бүлэ боложо, Яхадай республикын Нерюнгри хотын hургуулида багшын ажалай хүндыешье, hонирхолтойешье хүсэд ойлгожо абаhан байна. Үхибүүдэйнгээ багада нютагаа бусажа, Жаргал нүхэртэеэ еhотой гал гуламтаа түхеэржэ, ан бун ажаhуужа эхилээ бэлэй.
 
2001 онhоо түрэл hургуулидаа багшын ажалаа үргэлжэлүүлжэ эхилээ hэн. Жэл соо хүдэлөөд байхадань, эрилтэ ехэтэй, ажал эрхилжэ шадаха шадабаритай хадань найдажа, нютагай зон hургуулиин дарга болохыень аймагай гулваа Н.Д.Бадмаевта бэшэг бэшэhэн байна. Светлана Добчиновна Бубеева гансата зүбшөөлөө үгөөгүй. Яhала hайнаар бодомжолоо, алишье тээшэнь шэгнэжэ үзөөд, нүхэрэйнгөө, үхибүүдэйнгээ  дэмжэхэдэ, зүбшөөлөө үгэжэ, hургуулиин даргаар томилогдоо бэлэй.
 
Түрүүшын үдэрhөө эхилжэ, тон харюусалга ехэтэйгээр ажалдаа хандажа, эсэхэ сусахые мэдэнгүй хамсыгаа шуун ороо hэн. Түрүүшын алхамууд тиимэшье хүнгэн бэшэ байгаа. Теэд hанаhанаа хүсэжэ, hарбайhанаа абаха эрмэлзэл ехэтэй Светлана Добчиновна хайшан гэжэ hургуулияа үхибүүдэй хоердохи гэр болгохобди гэhэн зорилго багшанарайнгаа урда табижа, ажалаа тон эршэтэйгээр, дүн ехэтэйгээр эхилээ hэн. hургажа байhан  шабинараа дүрбэн тэгшээр hургаха ба хүмүүжүүлхэ гээшэ булта багшанарай гол зорилго.
 
Мүнөө үеын hургуули ямар эрилтэтэй байхаб гэжэ Харганаагай дунда hургуулиин багшанар тон hайнаар ойлгодог. Тиимэhээ даргынгаа эхилhэн хэрэгыень зүбөөр ойлгоод, дэмжэн ажалаа ябуулна. "Дуратай ажал гээшэ ажалай эхин гэдэг"- гэhэн  сэсэг үгэ бии. Һүүлшын дүрбэ табан жэлэй туршада hургуулимнай горитойхон амжалта туйлана гэжэ түрэлхид омогорхон баясадаг. Энэнь hургуулиин коллектив  ба шабинарые урмашуулан, ажалаа бүри эршэтэйгээр ябуулхадань туhална. Хэжэ байhан ажалынь Светлана Добчиновнагай бэлиг шадабариhаа, дүй дүршэлhөө дулдыдана. Энэ туйлажа байhан амжалтануудыень гүрэн түрэ зүбөөр сэгнэжэ, иимэ нэрэ зэргэнүүдые батадхаhан байна.
 
Диплом лауреата Республиканского конкурса «Лидер образования Бурятии»
 
«Лучший директор общеобразовательного учреждения РФ»
 
Почетный работник общего образования РФ
 
Лауреат проекта «Профессиональная команда страны»
 
Гансашье hургуулиингаа бэшэ, нютагайнгаа арад зоной дунда ажалаа эдэбхитэйгээр ябуулдаг хадань Сэлэнгын аймсоведтэ депутадаар нэгэн доро hунгагдаhан байгаа. Засагай дээдэ зургаанда яhала олон асуудалнуудые зүбөөр шиидхэхэ ажал ябуулна.
 
Тиимэhээ 2011 оной мартын17 –до үнгэргэдэhэн hунгалгын үедэ нютагай зоной дэмжэлтээр эгээн ехэ процент абажа, «Доодо Бүхэн» гэhэн поселениин гулваагаар томилогдоhон байна. Үнгэрhэн долоон  hарын туршада нютагай өөhэдын хүтэлбэриие хубилган  шэнэдхэхэ талаар яhала  дүн ехэтэйгээр ажалаа ябуулжа байна гэхэдэ алдуу болохогүй. Залуу шударгы урагшаа сэхэ тэгүүлэн холын бодолтойгоор ажалаа ябуулдаг хадаа үшөөл олон амжалтануудые туйлажа, нютагайнгаа арад зонойнгоо түлөө оролдожо hанаhанаа бүтээжэ, hарбайhанаа абажа ябаха гэжэ бата найдамаар байна. Хүндэтэ  Светлана Добчиновна гулваагаар, ТОСой ударидагшаар хүдэлhөөр, урма зоригтойгоор олон дабаануудые дабан гарахыетнай хүсэнэбди. Иимэл урагшаа эрмэлзэл ехэтэй зон Гуа сэсэн хатануудай нэрэ зэргэдэ хүртэхэл ёhотой гэжэ hанахаар ха.
 
Автор Жамсаранова Бимба Дашиевна