1728 онhоо эхилэн 1765 он хүрэтэр 37 жэл соо Байгалай үмэнэхи монгол-буряадууд ород гүрэнһөө туһаламжагүйгөөр алба түлэжэ байгаад, өөһэдын хүсөөр хилэ сахижа байhан юм

1727 ондо Хяагтаhаа зургаан модоной Бура гэжэ газарта граф Савва Рагузинский Ван Сэсэн хаан хоёр уулзажа, хилэ табиха тухай хөөрэлдөө хэжэ, хилын хэлсээн 1728 ондо баталагдаба. Тэрэ сагта хилэ хараха ород хүнүүдшье, хасаг сэрэгшье үгы бэлэй.

1728 онhоо эхилэн 1765 он хүрэтэр 37 жэл соо Байгалай үмэнэхи монгол-буряадууд ород гүрэнһөө туһаламжагүйгөөр алба түлэжэ байгаад, өөһэдын хүсөөр хилэ сахижа байhан юм. Харасайhаа баруун тээшэ Зэдын доллон харуулые Захааминай буряадууд, Армагай гурбан отог хамнигад, тэндэhээ сааша Түнхэн, Тура, Аха мүн Гарананай харуулнуудые Түнхэнэй буряадууд, мундаргануудай шэлээр ябадаг соёд, хамнигадтай хамта абаhан байна.

Захааминай долоон харуулнууд: Сээжын, Ключевской (Санагын), Модон хүлэй, Шара-Азаргын 1728 ондо, Хамниин, Сахирай 1768 ондо, Харасайн крепость 1773 ондо байгуулагдаа. Санагын харуул «Ключевской казачий посёлок» гэжэ нэрэтэй байhан юм.

1764 ондо Селенгинск хотын комендант генерал майор Якоби эзэн хаанай зарлигаар хилын тусхай сэрэг байгуулха тухай Сэлэнгын монгол-буряадуудтай хөөрэлдөө хэhэн юм. Мүн энэ асуудалаар хамнигадтай хөөрэлдөө. Тэндэ сугларhан буряадуудай, хамнигадай ноёд хилын сэрэг байгуулха тухай шиидхэбэри абаа. 600 сэрэгшэдтэй 4 полк, 500 сэрэгшэдтэй 1 полк, бүхыдөө 5 полкнууд байгуулагдаба. Эдэ хилын буряад сэрэгшэд баруун захын Үргэйдэhөө (Түнхэнэй шэлын нэрэ) зүүн хизаараар Шиилхэ хоёрой бэлшэр хүрэтэр хилые 1851 он болотор сахин хараа. 1851 оной шэнэ хуулиин ёhоор эдэ полкнуудые Байгалай хасаг сэрэг гэжэ нэрлэбэ.

Санага нютагай ехэнхи зон Түнхэнhөө ерэhэн юм.