Субаргамнай Лыгсэг ламхайн зохеоhон гоё hайхан зурагай ёhоор баригдаа. Нютагамнай бγхы сахюусад, сабдагууд, γбгэд, хγгшэдγγд бултандаа Орголи-Бγмбэгэр баабайдаа ерэжэ обоо тахилгандаа, бэшэшье буянайнгаа найр нааданда бултадаа сугларжа, бγхы зон амитадаа абаржа, хамгаалжа, оршолжо туhалжа байхын тγлѳѳ, хоер метр γндэртэй, дγрбэн зγг, нээмэн хизаар гэрэлтγγлжэ байhан толитой, ханхинажа байhан хонхонуудтай дэбисхэр дээрэ табан субарганууд бодхоогдоо.  Найиан саган гэшхγγр дээгγγр гэшхэжэ, субаргада ошожо, гол субарга доронь тотхоогдонхой. Сая мааниин хγрдэ эрьюлэн, буян олон байхамнай болтогой.

Субаргымнай дээдэ зγγн талада Гомбо сахюусан, Сагаан Дара эхэ, Аюша бурхануудые тахинхай, найман тахил γргэнхэй мунхан-γргѳѳгэй гэр табигдаа (нютагамнай Сγрэнхэр баабайтанай γргѳѳгэй гэр арюудхагдажа, асарагдажа табигдаа).

Орголи-Бγмбэгэр баабаймнай 1968 ондо, апрель hарын 18-да хадынгаа дунда тэбтэгhээ ѳѳрѳѳ томо монсогор шулуугаа тγлхижэ буулгаhан байгаа. Энэ шулуу Еши-Лодой Римбγγшэ Багша адисалжа, ѳѳрынгѳѳ гараар Бурхан Багшын тарни бэшээ. Тэрэ шулуун дээрэ армаг тодхоогдожо хоройлогдоо. Энэ тэмдэг боложо бууhан шулуундаа мγргэжэ адиста хγртэжэ байхабди.

Орголи-Бγмбэгэр баабаймнай баруун урда γндэр тэбтэг дээрэ алталмал шэрээр шэрдэгдэhэн тураг hогоон хоер ерэhэн зон, айлшадые хододо угтажа байха. Баруун хойто дунда тэбтэг дээрэ элинсэг хулинсагаймнай, уг гарбалаймнай эхин хоер hайхан дун саган хун шубууд нютагаа эрьен ниидэн дэбисэжэ байhаар тодхоогдоо.

Субаргымнай хоер талада обоо шулуун обоологдожо хии моридоо хиидхγγлхэ урганууд hулгагдаа. Обоо шулуунда арбан ехэ тахилгатай: Шулуута хγгшэн эжы, Баян Хаан, Даша Хаан, Дэлгэр Хаан, Бγрин Хаан, Улзытэ, Орголи-Бγмбэгэр баабай, Тутхалта, Хγхэ Шулуун, Yндэр Майла, Орголи, Хутаг γндэр, Буурал баабай, Бγтγγ баабай гэжэ хаданууудай обоогой газарhаа залагдаhан шулуунууд оролсонхой.

Багша ламханарай ном табижа уншалга бγтээжэ байха hарабша сарай баригдаа, тон урдань сэржэм хγншγγ табигдаха хонхон тогоон тотхоогдонхой, сэржэм далгаяаа табиха тэбхэр ужам хоер адяар бии. Хоер хажуу таладань хγн зоной мани мэгзэнээ уншан hуухыень hандайнууд табигданхай.

Субаргын бγхы барилга тойруулжа арбан хоер жэлэй тоогор дундаа табан γнгын тугуудтай, хорин дγрбэн hаднагуудтай хорой бγтэгдээ. Хоройн γγдэнэй хоер тγхэреэн hарабша баригдаа.

Арьяа Баала Бурхан Багшын тарни hаруул hайханаар γндэр томоор бэшэгдэжэ, эхэ зургаан зγйл, хамаг амитан буянтай байхан болтогой.

«ОМ МААНИ БАДМЕ ХУМ» – мγн энэ бэшээтэй тарни доро, баhал адли γзэгтэй «Амгаланта» – гэжэ бэшэгдээ.

Иигэжэ «Жанчип Чодон» субаргада hγгэдэн мγргэжэ, ажабайдалайнгаа hаад тотхор зайлуулжа, аян замда гарахадаа, бэринγγдые буулгахадаа, басагадаа хадамда хγргэжэ γдэшэхэдѳѳ, мγргэжэ ябахабди. Нютагархинаа, ерэhэн, ошоhон зониие урдаhаамнай угтажа, хойноhоомнай хаража манай субарганууд Орголи-Бγмбэгэр баабайтаяа байха. Мγн баhа морилжо ерэhэн багша-ламанарые, ерэhэн айлшад-сайднуудые субаргынгаа дэргэдэ угтамжа хэжэ, хγндэлэн байхабди.