Гарахаа байһан 2012 ониие (Зүүн зүгэй литээр Луу жэл февралиин 22-то эхилхэ) угтуулан, үнгэржэ байһан жэлэй һонин үйлэ хэрэгүүдээрээ, ялас гэмэ амжалтаараа хубаалдахыень, ерээдүйн түсэбүүд тухайгаа хөөрэжэ, Шэнэ жэлэй ямар хүсэл зорилгонуудые бултанда хүргэхөө байһан тухайгаа хөөрэхыень,  Оёорой һургуулиин багшанар ба һурагшадта хандаһан байнаб. Харюунуудынь Танай анхаралда.

Намсараев Нимажап Цыремпилович Зэдын аймагай Гэгээтэ тоонтотой, бар жэлтэй, Оёорой дунда һургуулиин директор, «Россин Федерациин эрдэм һуралсалай хүндэтэ хүдэлмэрилшэн», 2010 оной «Жэлэй эрхим директор».

2011 омнай намда ехэ удха шанартай, баян жэл болоо. Ажалай талаар гэбэл, «Манай һургуули» гэһэн президентын үүсхэлээр хэгдэһэн табан шэглэлтэй проектын ёһоор багшанар ба һурагшадай байдалые һайжаруулхын тула һургуулиимнай столоводо оборудовании абтаа, халуун ба хүйтэн уһа татаһан байнабди. Һургуулияа һуралсалай жэлдэ һайнаар бэлдээбди. Тохойнгоо һургуулида ехэ заһабарилга хэһэнэйнгээ түлөө «Лучшая инфраструктура» гэжэ шанда хүртөөбди.

Багшанарнай ехэ һайн үрэ дүнгүүдые харуулаа. Аймаг соогоо боложо байдаг «Жэлэй багша» гэһэн конкурсдо манай бэлигтэй тамирай багша Бадмаев Ю.Р. түрүү һуури эзэлжэ, республикада хабаадаад, 4 һуури эзэлжэ ерэһэн юм. Хүдэлжэ байгаа тамирай залынь «Республикын эрхим түрүү зал» болоо. Һайнаар хүдэлһэнэйнь түлөө Юрий Ринчиновичта «Россин Федерациин эрдэм һуралсалай хүндэтэ хүдэлмэрилшэн» гэһэн үндэр нэрэ зэргэ үгтэбэ.

Спортоор бэеэ һорилгын талаар ехэ ажал хэгдэһэн байна. «Олимпийцы» гэһэн һуралсалай ба социальна проект хамгаалжа, баруун талын округой һургуулинууд дунда элдэб мүрысөөнүүд үнгэргэгдөө. Тэдэнэй тоодо энэ зун , аймаг соогоо эгээ түрүүшынхиеэ болоһон,  уласхоорондын үхибүүдэй сурхарбаан.

Дүрбэн һурагшаднай «Национальное достояние» гэһэн бүхэроссин конференцидэ эдэбхитэйгээр хабаадажа,  Москва хотодо баһал түрүү һуури эзэлээд, түрэл нютагаа сурхуулба.

Үшөө тиихэдэ, өөрөө эрдэмээ дээшэлүүлхэеэ Россин президентын зүбшөөлөөр Эрхүү хотото томилогдоһон Сибириин академидэ һуража ерээб.

Гэр бүлэдэмнай үшөө нэгэ баяр-  аша хүбүү басага хоёртой болообди.

2012 ондо табиһан түсэбүүднай хадаа, инфраструктура хүгжөөлгын талаар ехэ туһаламжа хүлеэжэ байнабди.Һургуулиимнай сонхонууд, шала һэлгэгдэхэ, дулаа оруулха һанаатайбди, тамирай зал соогоо барилдаанай, шатарай, теннисэй  багахан залнуудые түхеэрхэбди. Энэмнай хадаа, 2011 онһоо 2015 он болотор бэелүүлхэ шэнэ хүгжэлтын «Школа развития и здоровья» гэһэн программын ажал ябуулга болоно. Саашадаа Монгол ороной  Баянголой һургуулитай хани барисаагаа улам үргэнөөр үргэлжэлүүлхэбди.

Гаража байгаа луу жэлдээ булта эбтэй эетэй, удаан жаргалтай, ажалдаа амжалтатай, элүүр энхэ ябахыетнай хүсэнэб.